U subotu, 14 studzienia, u Słucku siabry inicyjatyŭnaj hrupy «Dzieja» źbirali podpisy za ŭstalavańnie pomnika hierojam Słuckaha zbrojnaha čynu. Za dzień aktyvisty sabrali 500 podpisaŭ, a ahułam za niekalki vyjezdaŭ u Słuck jany sabrali ŭžo 935 podpisaŭ. Zbor podpisaŭ budzie tryvać da kanca studzienia. Potym aktyvisty płanujuć pieradać ich miascovym uładam i ŭ Minabłvykankam, kab inicyjavać hramadskija słuchańni.
Inicyjataram zboru podpisaŭ vystupiła słučanka Alina Nahornaja: «U nas jość meta sabrać jak minimum 1000 podpisaŭ, kab pačać pieramovy z uładami. Navat kali jany i nie pojduć nam nasustrač, to ŭ vyniku hramadskich słuchańniaŭ bolš słuččakoŭ daviedajecca pra Słuckaje paŭstańnie. Miesca i hrošy dla pomnika my hatovyja šukać samastojna».
Alina Nahornaja.
Padčas zboru podpisaŭ słuččaki cikavilisia temaj paŭstańnia. Niekatoryja niešta čuli i pamiatali, ale bolšaść ludziej padrabiaznaściej tych padziej nie viedajuć. Alina Nahornaja patłumačyła heta nastupnym čynam: «Pa-pieršaje, na zaniatkach pa Historyi Biełarusi ŭ škole hetyja padziei amal na razhladajucca. Pa-druhoje, miascovyja ŭłady čamuści naściarožana staviacca da hetaj temy, i my nie možam zrazumieć čamu. U našym rajonie adnojčy byŭ masavy prahlad dakumientalnaha filma vytvorčaści dziaržaŭnaha telekanała ANT. Ale navat jon byŭ sarvany, bo ŭ budynak, dzie adbyvaŭsia prahlad, uvarvaŭsia AMAP.
Čamuści ŭłady nie razumiejuć, što kali b my ŭšanavali pamiać hierojaŭ paŭstańnia, to ŭ naš rehijon paciahnulisia b turysty! Mahčyma, ułady adnosiacca z aściarohaj da Słuckaha paŭstańnia tamu, što kožny hod u Słucku palityčnyja siły ładziać mitynh, pryśviečany hetym padziejam, i hetaja tema asacyjujecca va ŭładaŭ z «apazicyjaj».
Siabra ruchu «Za svabodu» Aleś Łahviniec adznačyŭ: «U apošni čas biełaruskija ŭłady pačali kazać pra važnaść niezaležnaści. I my im jak raz chacieli b dapamahčy ŭ budaŭnictvie sapraŭdnaj niezaležnaści. Historyja Słuckaha paŭstańnia — kankretnaja dziaržaŭnickaja tradycyja, jakaja pakazvaje, što ŭ nas za niezaležnaść tak ci inakš išło zmahańnie. I tolki savieckaj historyjaj tut abmiežavacca niemahčyma».
Aleś Łahviniec i Alina Nahornaja.
Nie ŭsie słuččaki naohuł viedali pra paŭstańnie. Ale navat tyja, chto nie viedaŭ, taksama stavili svaje podpisy za ŭstalavańnie pomnika. 22-hadovy chłopiec Dźmitryj, jaki pastaviŭ svoj podpis, patłumačyŭ heta nastupnym čynam: «Dumaju, što pomnik varta ŭstalavać. Ja sam słuččak i navat nie viedaju pra hetyja padziei. Mahčyma, paśla ŭstaloŭki pomnika my b bolš viedali pra historyju rodnaha kraju».
Słuččak Dźmitryj pastaviŭ svoj podpis za ŭstalavańnie pomnika.
Kab padtrymać inicyjatyvu, vy možacie padpisacca i pad elektronnym zvarotam.
