Ministerstva ekanomiki zacikaŭlena ŭ bolš aktyŭnaj samaarhanizacyi biźniesu i vykazvaje hatoŭnaść słuchać lubyja prapanovy biźniesu, navat samyja radykalnyja.
Pra heta zajaviŭ namieśnik dyrektara departamienta pa pradprymalnictvie Minekanomiki Alaksandr Kalinoŭski 16 studzienia na pasiadžeńni kruhłaha stała ŭ ramkach prajekta «Publična-pryvatny dyjałoh» prahramy Uschodniaha partniorstva EastInvest II.
Pavodle jaho słoŭ, dakładna nie viadoma, kolki pradstaŭnikoŭ biźniesu ŭ Biełarusi ŭvachodzić u pradprymalnickija sajuzy. «Važnaje pytańnie, jakoje turbuje Minekanomiki, — heta členstva biźniesu ŭ asacyjacyjach i sajuzach. Na žal, siońnia nie isnuje dakładnych statystyčnych dadzienych ab tym, jakaja kolkaść sub`iektaŭ małoha i siaredniaha pradprymalnictva ŭvachodzić u takoha rodu arhanizacyi. Zhodna z roznymi vybaračnymi daśledavańniami, hetaja ličba vahajecca u dyjapazonie ad 5 da 15% [ad ich ahulnaj kolkaści]. Heta niašmat», — adznačyŭ Kalinoŭski.
Pradstaŭnik ministerstva padkreśliŭ, što dla efiektyŭnaha dyjałohu biźniesu i ŭłady nieabchodna pavyšać achop i pradstaŭnictva biźniesmienaŭ u dziełavych sajuzach. «My hatovyja siońnia słuchać lubyja prapanovy, lubyja rašeńni — navat samyja radykalnyja. Usim viadoma, što ŭ šerahu krain Jeŭrapiejskaha sajuza zakanadaŭča ŭviedziena abaviazkovaje členstva pradprymalnikaŭ u biźnies-asacyjacyjach. Takija varyjanty my taksama hatovyja razhladać, kali buduć takija prapanovy, čamu b i nie. Ale ŭ hetym pytańni my nie chočam prymać paśpiešnych rašeńniaŭ, budziem pracavać vyklučna va ŭzajemadziejańni z sajuzami i asacyjacyjami», — udakładniŭ jon.
Pry hetym Kalinoŭski padkreśliŭ, što ministerstva razhladaje biźnies-asacyjacyi, jakija pracujuć u krainie, jak važnaje źviano pry padrychtoŭcy dziaržaŭnych rašeńniaŭ. Čynoŭnik udakładniŭ, što važnaść takoha ŭzajemadziejańnia ŭzraście paśla płanavanaha ŭviadzieńnia ŭ 2017 hodzie miechanizmu acenki rehulujučaha ŭździejańnia prajektaŭ narmatyŭnych aktaŭ, jakija tyčacca pradprymalnickaj dziejnaści. «Kali hety miechanizm zapracuje, to ab`iom i nahruzka na biźnies-sajuzy, na asobnych členaŭ biźnies-supolnaści ŭzraście», — skazaŭ jon.
Namieśnik dyrektara departamienta źviarnuŭ uvahu, što sa svajho boku Minekanomiki prapanavała ŭzmacnić pradstaŭnictva biźniesu ŭ dziejnych pry dziaržorhanach hramadska-kansultatyŭnych savietach. U vyniku ŭ kastryčniku minułaha hoda pastanovaj urada zamacavana norma ab tym, što nie mienš za pałovu składu takich savietaŭ pavinny pradstaŭlać pradprymalniki.
