Jeŭrapiejski sud pa pravach čałavieka pryznaŭ, što rasijskija ŭłady niepravamierna spynili praceduru ŭsynaŭleńnia dziaciej u amierykanskija siemji z-za pryniaćcia ŭ Rasii zakanadaŭčaj zabarony ŭ 2012 h. Rašeńnie apublikavana na sajcie JESPČ, piša meduza.io.

Sud padtrymaŭ 45 amierykanskich zajaŭnikaŭ, jakija paskardzilisia na toje, što im admovili va ŭsynaŭleńni, choć jany ŭžo pačali afarmlać nieabchodnyja dakumienty.

Amierykancy ŭ svajoj skarzie ŭkazali, što jany da momantu pryniaćcia zakona paśpieli paznajomicca ź sirotami i naładzić ź imi adnosiny, a značyć zakon, na ich dumku, umiašaŭsia ŭ pryvatnaje žyćcio siamji. Zabaronu na ŭsynaŭleńnie jany paličyli dyskryminacyjaj pa nacyjanalnaj prykmiecie.

Sud padtrymaŭ hetyja zajavy ŭ častcy dyskryminacyjnaj palityki rasijskich uładaŭ, bo pačatyja pracedury ŭsynaŭleńnia byli spynienyja.

Pa kožnaj z 22 skarhaŭ (niekatoryja zajaŭniki padavali dakumienty parami) prysudžana kampiensacyja ŭ pamiery troch tysiač dalaraŭ. Sud taksama abaviazaŭ Rasiju pakryć vydatki zajaŭnikaŭ u pamiery 600 dalaraŭ.

Rasijski sudździa JESPČ Dźmitryj Dziedaŭ vystupiŭ z asablivym mierkavańniem pa hetaj spravie. Padstavu dla skarhi jon nazvaŭ «techničnaj» traktoŭkaj Kanviencyi ab pravach čałavieka, bo praces usynaŭleńnia na momant źjaŭleńnia zabarony nie byŭ zavieršany. Prysudžanuju kampiensacyju jon paličyŭ simvaličnaj u paraŭnańni z sumami, jakija zvyčajna fihurujuć u rašeńniach JESPČ.

***

Zakon ab zabaronie na ŭsynaŭleńnie ŭstupiŭ u siłu z 1 studzienia 2013 hoda. Nieaficyjnuju nazvu dakumient atrymaŭ u pamiać pra Dzimu Jakaŭleva — adnahadovaha chłopčyka, jaki zahinuŭ u amierykanskaj siamji praz try miesiacy paśla ŭsynaŭleńnia ŭ 2008 hodzie.

Asnoŭnaja častka zakona pryśviečana sankcyjam suprać amierykancaŭ i hramadzian inšych krain, jakija ŭviali zabaronnyja miery suprać rasijanaŭ. Rasijski zakon byŭ pryniaty nieŭzabavie paśla amierykanskaha «zakona Mahnickaha», jaki ŭvioŭ sankcyi suprać asob, zvanych datyčnymi da śmierci jurysta Siarhieja Mahnickaha ŭ maskoŭskim SIZA. Aficyjna rasijskaje kiraŭnictva admaŭlaje suviaź pamiž zabaronaj na ŭsynaŭleńnie i amierykanskimi sankcyjami.

U lipieni 2013 hoda Rasija pašyryła zabaronu na ŭsynaŭleńnie zamiežnikami. Ciapier usynaŭlać rasijskich dziaciej zabaroniena hramadzianam tych dziaržaŭ, dzie lehalizavanyja adnapołyja šluby.

Клас
0
Панылы сорам
0
Ха-ха
0
Ого
0
Сумна
0
Абуральна
0