U sudzie Navabielickaha rajona Homiela pačaŭsia praces pa administratyŭnaj spravie: były milicyjant napisaŭ «Ukantakcie» abraźlivy kamientar pra biełaruskuju movu. A miascovy aktyvist napisaŭ na taho zajavu.

U supołcy Ukantakcie papularnaha homielskaha sajta «Mocnyja naviny» była źmieščanaja apytanka: «Jakaja hałoŭnaja mova hamielčukoŭ?» U varyjantach prapanoŭvałasia biełaruskaja, ruskaja i trasianka.

Vasil Varuščanka pakinuŭ pad dopisam nastupny kamientar: «Biełaruskaja mova — heta trup, jaki hnije, jaho para ŭžo zakapać jak maha hłybiej. Tak liču».

Karystalniki zacikavilisia kamientataram — i asabliva jahonymi nieardynarnymi fotazdymkami. Vyśvietliłasia, što mužčyna da 2013 hoda pracavaŭ u miascovym Departamiencie achovy MUS.

A Ihar Słučak, homielski aktyvist, nakiravaŭ zajavu ŭ Homielski harvykankam z prośbaj pryciahnuć da adkaznaści hramadzianina, jaki abraziŭ biełaruskuju movu. Aktyvist paličyŭ, što hetym vykazvańniem aŭtar parušyŭ zakanadaŭstva ab movach (artykuł 9.22 KoAP).

Namieśnik kiraŭnika administracyi Navabielickaha rajona Vasil Zubiec paviedamiŭ, što kamientaryj hramadzianina pra biełaruskuju movu jak «hniły trup» byŭ nakiravany na ekśpiertyzu z pytańniem, ci možna ličyć takoje vykazvańnie abraźlivym dla biełaruskaj movy. Ekśpierty paćvierdzili — vykazvańnie abraźlivaje.

I voś u vyniku Varuščanka ŭ sudzie. Jamu pahražaje štraf ad 4 da 10 bazavych vieličyń.

Pierad pasiadžeńniem chłopiec pryznaŭsia, što pierahledzieŭ svaju pazicyju.

«Pierahnuŭ ja pałku svaim vykazvańniem, tak. Toj kamientar byŭ hłupstvam. Pakryŭdzić ja nikoha nie chacieŭ. Mova nie miortvaja, usio ž ludzi jej karystajucca, — skazaŭ Vasil. — Ale kryŭdy na aktyvistaŭ, što začapilisia za hetu historyju nie maju — heta ich ułasnaja seksualnaja drama. Praca ŭ ich takaja, jany hrošy za heta atrymlivajuć, miarkuju».

«Ci liču, što vinavaty ja? Nu, kali zakon parušyŭ, to vinavaty», — pacisnuŭ plačyma Varuščanka.

Razhladaje spravu sudździa Dźmitry Kazłoŭ.

24-hadovy Varuščanka pryjšoŭ u sud adzin — bieź siabroŭ ci pravaabaroncaŭ.

«Mety kahości kryŭdzić ja nie mieŭ, — paŭtaryŭ Vasil i pierad sudździoj. — Vinu svaju ja pryznaju i raskajvajusia. Kali maje słovy pryznali abrazaj, to tak i jość. Ja całkam zhodzien z ekśpiertami, jany ludzi kampietentnyja — kali vyrašyli tak, značyć tak. Niaviedańnie zakona nie vyzvalaje ad adkaznaści — i ja paniasu pakarańnie».

Sudździa Kazłoŭ pryznaŭ Varuščanku vinavatym i daŭ jamu maksimalnaje pakarańnie — 10 bazavych (230 rubleŭ).

«Niedapuščalna tak pavodzić siabie hramadzianinu Respubliki Biełaruś», — skazaŭ sudździa.

Uvieś praces zaniaŭ 17 chvilin.

«Ci spraviadliva pakarali mianie? Tak, całkam. Ci budu jašče pisać takija kamientary? Pahladzim», — skazaŭ žurnalistam Varuščanka.

Abskardžvać prysud Varuščanka nie budzie — navat štraf jon pajšou płacić adrazu paśla abviaščeńnia prysudu.

«Da biełaruskaj movy stavicca inakš ja nie staŭ. Mnie jak było fijaletava, tak i zastałosia. Mnie mova nie pieraškadžaje», — skazaŭ na raźvitańnie Varuščanka.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?