27 studzienia ŭ Homielski harvykankam padadzienaja zajaŭka na praviadzieńnie «Maršu niedarmajedaŭ — razzłavanych biełarusaŭ».
Inicyjatarami masavaha mierapryjemstva, jakoje zapłanavana pravieści ŭ Homieli 19 lutaha pa vulicy Savieckaj, vystupili rehijanalnyja struktury Abjadnanaj hramadzianskaj partyi, Biełaruskaj partyi levych «Spraviadlivy śviet», arhkamiteta pa stvareńni partyi «BCHD», pradstaŭniki Biełaruskaha nacyjanalnaha kanhresa, inšyja ruchi i inicyjatyvy.
«Meta maršu — pryciahnuć uvahu hramadzian da prablemy prymusovaj pracy, niezakonnaha pieraśledu niepracujučych hramadzian, dyskryminacyjnaha i antykanstytucyjnaha dekreta № 3», — paviedamiŭ namieśnik staršyni AHP Vasil Palakoŭ.
Rašeńnie ab praviadzieńni masavaha mierapryjemstva było pryniataje 26 studzienia na pasiadžeńni arhkamiteta pa praviadzieńni maršu.
Razam z tym u členaŭ arhkamiteta, pavodle słoŭ Palakova, niama vialikich čakańniaŭ, što ŭłada dazvolić jaho pravieści. Rašeńnie pravieści masavaje šeście biez sankcyi ŭładaŭ budzie prymacca paśla aficyjnaha adkazu i z ulikam ahulnych nastrojaŭ u rehijonie.
U hramadska-palityčnym centry na Paleskaj, 52, u Homieli byŭ arhanizavany zbor podpisaŭ za admienu dekreta № 3 «Ab papiaredžańni sacyjalnaha ŭtrymanstva», siudy ž u «ofis apazicyi» ludzi prychodzili pa jurydyčnuju dapamohu ŭ suviazi z atrymańniem paviedamleńniaŭ ad padatkovaj inśpiekcyi ab nieabchodnaści vypłaty zboru «z darmajedaŭ». Tut byli sabranyja kala 700 podpisaŭ za admienu dekreta. Taksama ŭ Homieli i vobłaści hramadzianie pa svajoj inicyjatyvie źbirajuć podpisy za admienu dekreta ab «darmajedstvie».
Apazicyjnyja i demakratyčna nastrojenyja partyi i arhanizacyi ŭ Minsku i rehijonach pačali roznyja kampanii za admienu dekreta «ab darmajedach». Siarod inšaha 17 lutaha ŭ stalicy płanujecca «Marš razzłavanych biełarusaŭ» suprać niezakonnych paboraŭ uładaŭ. Apazicyja taksama maje namier pravieści ŭ Minsku 15 sakavika, u Dzień Kanstytucyi, vuličnuju akcyju z udziełam hramadzian, pryznanych płacielščykami zboru na finansavańnie dziaržvydatkaŭ, — «Marš niedarmajedaŭ».
