Fiederalny akruhovy sud u Ńju-Jorku nakłaŭ časovuju zabaronu na vysyłku mihrantaŭ ź dziejučymi amierykanskimi vizami z aeraportaŭ ZŠA, niahledziačy na ŭkaz prezidenta Donalda Trampa.
Takim čynam sudździa En Doneli zadavoliła pazoŭ Amierykanskaha sajuza abarony hramadzianskich svabod (ACLU). Pa dadzienych sajuza, rašeńnie zakranie amal 200 čałaviek, jakija znachodziacca ŭ tranzitnych zonach aeraportaŭ ZŠA, piša Bi-bi-si.
Pavodle pryniataha ŭ piatnicu ŭkaza, ZŠA spynili pryjom siryjskich biežancaŭ i zamarozili na 120 dzion prahramu pryjomu biežancaŭ ź inšych krain, kab nie dapuścić u krainu «radykalnych musulmanskich terarystaŭ».
Z rasparadžeńnia Trampa vynikała, što hramadzianie Iraka, Irana, Jemiena, Livii, Siryi, Samali i Sudana pavinny admovicca ad palotu ŭ Amieryku, kali ŭ ich niama vidu na žycharstva ŭ ZŠA ci dypłamatyčnaj vizy.
Paśla hetaha jurysty ACLU padali pietycyju ad vychadcaŭ z hetych krain, zatrymanych u amierykanskich aeraportach. Pa dadzienych ministerstva ŭnutranaj biaśpieki ZŠA, zabarona ŭžo zakranuła bolš za 100 čałaviek.
Amierykanski nacyjanalny pravavy centr pa pytańniach imihracyi (NILC) paviedamiŭ Bi-bi-si, što padaje ŭ sud na prezidenta Trampa i kiraŭnika ministerstva ŭnutranaj biaśpieki ZŠA. Pra namier padać sudovy pazoŭ zajaviŭ i Saviet pa amierykana-isłamskich adnosinach (CAIR).
Pa dadzienych amierykanskich ŚMI, sudovaje rašeńnie dziejničaje pa ŭsioj krainie; jano časova zabaraniaje ŭładam ZŠA departavać tych, chto padpadaje pad prezidencki ŭkaz, a taksama abaraniaje pravy ŭsich, chto maje uchvalenaje zajavu ab pradastaŭleńni statusu biežanca.
