Biełaruś pieradaść Sierbii dva dyvizijony (12 samachodnych ahniavych ustanovak) zienitna-rakietnych kompleksaŭ «Buk» i dva źviany (vosiem mašyn) šmatcelevych źniščalnikaŭ čaćviortaha pakaleńnia MiH-29 z umovaj, što Białhrad apłacić ich ramont i madernizacyju. Jak paviedamiŭ ministr abarony Sierbii Zoran Džordževič, viarnuŭšysia z pajezdki ŭ Minsk, technika budzie pastaŭlenaja ŭ 2018 hodzie.
«Havorka idzie pra dva dyvizijony sistemy «Buk» i pra vosiem MiH-29, jakija pavinny być pieradadzienyja na praciahu nastupnaha hoda. Razam z samalotami, jakija pieradaść Sierbii Rasija, sistema SPA Sierbii značna ŭzmocnicca», — zajaviŭ sierbski ministr. Detali supracoŭnictva buduć abmiarkoŭvacca z maja hetaha hoda, kali praduhledžana stvareńnie sumiesnaha orhana pa supracoŭnictvie ŭ halinie abarony, anałahičnaha tym, jakija ŭžo isnujuć u Sierbii ź inšymi krainami. U suviazi z hetym kiraŭnik vajennaha viedamstva nie moh nazvać dakładnuju sumu, jakaja spatrebicca na ramont i madernizacyju ZRK «Buk» i MiHaŭ.
Džardževič taksama adznačyŭ vialiki patencyjał sierbska-biełaruskich adnosin u vajenna-techničnaj halinie, a taksama mahčymaść stvareńnia sumiesnych prajektaŭ u abaronnaj pramysłovaści z vychadam na rynki trecich krain. «Biełaruskija hruzaviki i budaŭničaja technika byli b cikavyja dla sierbskaj armii. Jość mahčymaść supracoŭnictva pa pytańni ramontu i madernizacyi roznych sistem zbroi rasijskaha pachodžańnia», — skazaŭ ministr, dadaŭšy, što Biełaruś zacikaviłasia rakietnym palivam i inšymi tavarami sierbskaj pramysłovaści.
Premjer-ministr Sierbii Alaksandar Vučyč naviedaŭ ź vizitam Minsk 26—27 studzienia.
