Biełaruski nacyjanalny kanhres (BNK) praciahvaje farmiravańnie rehijanalnych kaalicyj demakratyčnych sił krainy.
Jak paviedamiŭ na svajoj staroncy ŭ «Fejsbuku» były palitviazień Mikałaj Statkievič, adzin z členaŭ savieta BNK, 28 studzienia ŭ Maładziečnie adbyŭsia schod pradstaŭnikoŭ demakratyčnych arhanizacyj rehijona Vilejka — Maładziečna. Na schodzie vystupili pradstaŭniki savieta BNK Jaŭhien Afnahiel, Uładzimir Niaklajeŭ i Mikałaj Statkievič.
Schod vyrašyŭ stvaryć rehijanalnuju kaalicyju. Jaje kiraŭnikom abrany Alaksandr Abramovič (BSDP (Hramada), namieśnikami kiraŭnika kaalicyi — Uładzimir Malarčuk (AHP) i Aleh Jachimovič (BSDP (Hramada)). Paśla pryznańnia pratakołu schodu savietam BNK Abramovič stanie členam savieta.
Statkievič nahadaŭ, što zhodna z rašeńniami ŭstanoŭčaj siesii kanhresa, u kožnaj vobłaści Biełarusi pavinny być utvoranyja pa try rehijanalnyja kaalicyi demakratyčnych sił — 18 pa ŭsioj krainie. Kiraŭniki rehijanalnych kaalicyj razam ź lidarami ahulnanacyjanalnych arhanizacyj, jakija padtrymali kanhres, na roŭnych utvarajuć saviet BNK, adznačyŭ palityk.
Novaja rehijanalnaja kaalicyja (Vilejka — Maładziečna) ź`iaŭlajecca 13-j pa liku ŭ składzie BNK, paviedamiŭ Statkievič. Pavodle jaho słoŭ, praces kansalidacyi demakratyčnych sił budzie praciahnuty.
Biełaruski nacyjanalny kanhres byŭ stvorany pa inicyjatyvie hrupy hramadskich i palityčnych dziejačaŭ z metaj kansalidacyi apazicyi. U jaho arhkamitet uvajšli Mikałaj Statkievič, Uładzimir Niaklajeŭ, Stanisłaŭ Šuškievič, Dźmitryj Daškievič, Viačasłaŭ Siŭčyk, Andrej Sańnikaŭ, Hienadź Fiadynič, Michaił Pastuchoŭ. Ciapier kanhres dziejničaje ŭ formie savieta. Jaho pieršaje pasiadžeńnie prajšło 28 maja 2016 hoda.
