U kožnym ajčynnym supiermarkiecie i kramie možna znajści takija rečy, jakija buduć usprymacca jak ekzotyka ŭ Zachodniaj Jeŭropie i ZŠA. «NN» prapanuje śpis praduktaŭ, jakimi moža hanarycca naša kraina.
Hłazuravanyja syrki
Adzin ź pieršych biełaruskich praduktaŭ, na jaki padsadžvajucca zamiežniki — heta hłazuravanyja syrki. Dalikates, jakoha nie viedajuć nidzie ŭ śviecie, aproč krain Bałtyi, SND i Vienhryi. Ale mała jakija mohuć paraŭnacca ź biełaruskimi. Ich u nas dziasiatki vidaŭ. Pasprabuj abiary, ci tabie chočacca syrok-bulbačku ci z kakosam, ź piačeńniem ci biez. A samyja kłasičnyja — heta syrki z vanilnym tvaražkom i chrumstkim šakaładam. Syrki lubiać i darosłyja, i dzieci, bo jany dastupnyja pa canie i pryjemnyja pa smaku.
Zhuščonka
Nie tak daŭno ŭ internecie źjaviŭsia zdymak, dzie kultavaja polskaja łyžnica, dvuchrazovaja alimpijskaja čempijonka Justyna Kavalčyk na zborach fotkajecca ź biełaruskaj zhuščonkaj. Dla spartoŭcaŭ hety pradukt vyhadny tym, što zdolny chutka ŭznaŭlać bałans u arhaniźmie. Sama technałohija vyrabu zhuščonki źjaviłasia jašče ŭ siaredzinie XIX stahodździa ŭ ZŠA, ale papularnaść hety pradukt nabyŭ mienavita na našych abšarach. Adzinaje, u čym nikoli nie znojduć zhodu adepty zhuščonki, čyja ž lepšaja — hłybockaja ci rahačoŭskaja. A što dumajecie vy nakont hetaha?
Biarozavik
Mahčyma, heta i aniekdot, ale časta možna pačuć historyi, kali niemiec ci francuz čuje pra biarozavy sok, to jaho vočy akruhlajucca i jon ujaŭlaje, jak sok vyciskajuć z dreva. Biełaruskija lashasy zatočanyja na toje, kab viasnoj sabrać jak maha bolej biarozaviku. Potym uvieś hod jaho možna kuplać u kramach. Biarozavik krychu ekspartujuć za miažu, ale ŭ małych abjomach. Niekalki hadoŭ tamu zamiežnaja presa vypuściła šerah artykułaŭ pra «napoj, lepšy za vadu». Biełaruski biarozavik karystajecca papularnaściu ŭ zorak nakštałt Hvinet Pełtraŭ, jakaja pierakananaja, što napoj dapamahaje joj zachavać dobruju fihuru.
Čypsy płaścinkami
Hetuju technałohiju pryhatavańnia čypsaŭ asvoili jašče ŭ časy BSSR, spačatku ŭ Marjinaj Horcy. Tady ich hatavali prosta z bulby biez usialakich dadatkaŭ. A na siońnia čypsy płaścinkami stali adnoj ź vizitovak biełaruskaj hastranamii, ich ceniać za naturalnaść. Takija čypsy možna znajści navat u pieraborlivym da čužoj ježy Kitai.
Ziefir
Babrujskaja fabryka «Čyrvony charčavik» chutka zaryjentavałasia, što biełaruski ziefir vielmi časta viazuć u padarunki dla zamiežnikaŭ, tamu pačali vypuskać pryhožyja ŭpakoŭki z tradycyjnymi biełaruskimi ŭzorami ŭ jakaści suvienira. U amierykancaŭ jość maršmełaŭ, jakoje niečym addalena nahadvaje naš ziefir, ale smak usio ž zusim inšy. Ziefir — heta ŭźbitaje sadavinava-jahadnaje piure z cukram i jajkami. Dalikatny łasunak.
Kiefir
Režysior «Svabodnaha teatra» Mikałaj Chalezin, jaki ciapier žyvie ŭ Łondanie, u adnym z intervju kazaŭ, što z usich biełaruskich tavaraŭ jamu za miažoj nie chapaje tolki kiefiru. U zachodnich supiermarkietach takoha napoju nie znajści. Kiefir — vielmi karysny napoj, tamu ŭ savieckich, a ciapier i ŭ biełaruskich balnicach jaho prapanujuć na noč pacyjentam. Darečy, nie paŭsiul možna znajści i słavianskuju śmiatanu, choć hety soŭs karyśniejšy, skažam, za majanez.
Žuraviny ŭ cukry
Adzin z najsmačniejšych biełaruskich dalikatesaŭ. Naša kraina słavicca svaimi lasnymi jahadami — čarnicy, maliny, durnicy, bruśnicy. A taksama i sadovymi — tyja ž čyrvonyja parečki. A asobna vyłučyć možna cukierki — žuraviny ŭ cukry. Pa zbory žuravin naša kraina zajmaje adno ź viadučych miescaŭ u śviecie. Spałučeńnie jahadnaj kiślinki i sałodkaj abhortki robiać prysmak takim papularnym siarod zamiežnikaŭ. Pryvieźci ŭ padarunak niekalki upakovak žuravin — biasprojhryšny varyjant.
Sała
Časta davodzicca čytać intervju z emihrantami, jakija raskazvajuć, što za miažoj im nie chapaje našaha sała. Kab razam z čornym chlebam, cybulaj ci časnykom, a jašče vypić nievialikuju čarku harełki. Pry žadańni, kaniečnie, sała možna znajści šmat dzie, u toj ža Amierycy, ale kultura spažyvańnia hetaha praduktu nie raźvitaja nastolki, jak u nas. Biełarusy viedajuć dziasiatki receptaŭ zasołki sała. Heta biełaruski honar i adna z vyznačalnych straŭ.
Kvas
U letniuju śpioku kisły kvas spatolvaje smahu lepš, čym lubaja haziroŭka. Pracent ałkaholu ŭ kvasie zusim mały, tamu paśla jaho svabodna možna sadzicca za rul. Biełarusy zachavali tradycyi pryhatavańnia kvasu. Jaho vyrablajuć jak na vialikich zavodach, hetak i ŭ pryvatnych haspadarkach. Vyrablajuć jaho šlacham zakisańnia jačmiennaha soładu. Kvas, jak i kiefir, karysny dla straŭnika.
