Vučań adnoj sa škoł źviarnuŭsia da miedykaŭ sa skarhaj na ŭkus kazurki ŭ staličnym zaaparku 13 sakavika. Heta pieršy vypadak u hetym hodzie, jaki zafiksavali ŭ stalicy, paviedamili ahienctvu «Minsk-Naviny» ŭ Centry hihijeny i epidemijałohii Leninskaha rajona.

«Pik aktyŭnaści klaščoŭ prypadaje na viasnovyja miesiacy, — raskazvaje entamołah Śviatłana Šymanskaja. — Upadabanyja zony pražyvańnia klašča: zacienienyja i vilhotnyja liścianyja i miašanyja lasy z hustym travastojem i padleskam. Na čałavieka ci žyviołu pieraskokvaje z raślin na vyšyni da mietra. A potym paŭtary-dźvie hadziny vybiraje sabie padychodziačaje miesca. U čałavieka, jak praviła, heta nohi, pachvinnaja i padpachavaja vobłaści, śpina, šyja i skura za vušami. Klaščy ŭ Biełarusi mohuć być zaražanyja ŭzbudžalnikami infiekcyjnych zachvorvańniaŭ, čaściej za ŭsio rehistrujucca vypadki Łajm-barelijozu, radziej — kleščavoha encefalitu».

Kab paźbiehnuć ukusaŭ klaščoŭ, miedyki rekamiendujuć pravilna apranacca na špacyr u parkavych zonach i pry pajezdkach u les. Adzieńnie pavinna być z doŭhimi rukavami, ščylnymi manžetami. Kaŭnier treba zašpilvać, kašulu i majku zapraŭlać u štany, a štany — u škarpetki. Na hałavu abaviazkova naciahvać kaptur abo hałaŭny ŭbor. Rekamiendujecca vykarystoŭvać srodki abarony (repielenty). Pry hetym treba trymacca dalej ad kustoŭ i vysokaj travy i kožnyja 1-2 hadziny abaviazkova pravodzić prafiłaktyčny ahlad adzieńnia i adkrytych učastkaŭ cieła.

Nieabchodna pamiatać, što klaščoŭ možna zanieści ŭ dom z kvietkami, jahadami ci hrybami. Da ŭvahi: čabor i šałfiej adpužvajuć kryvasmokaŭ.

Kali ŭsio ž klešč ukusiŭ, treba adrazu ž źviarnucca da doktara. Kali niama takoj mahčymaści, parazita nieabchodna vydalić, razhojdvajučy za bruška, pincetam abo piatloj z tryvałaj nitki, nakinutaj jak maha bližej da chabatka. Klašča možna dastać pradezynfikavanaj ihołkaj, jak stremku. Miesca ŭkusu apracavać trochpracentnym pierakisam vadarodu, jodam abo inšym śpirtavym rastvoram. Kali tempieratura padnimiecca ci źjavicca plama na miescy ŭkusu — nieadkładna iści da doktara-infiekcyjanista.

Клас
Панылы сорам
Ха-ха
Ого
Сумна
Абуральна