Uviadzieńnie zboru na finansavańnie dziaržvydatkaŭ adpaviadaje Kanstytucyi. Pra heta skazana ŭ adkazie Kanstytucyjnaha suda na elektronnyja zvaroty hramadzian pa dekrecie №3, raźmieščanym na sajcie KS.
Kanstytucyjny sud pravodzić abaviazkovy papiaredni kantrol kanstytucyjnaści zakonaŭ, pryniatych parłamientam, da ich padpisańnia prezidentam. Aceńvałasia i kanstytucyjnaść zakonaŭ, jakija praduhledžvali ŭniasieńnie źmianieńniaŭ i dapaŭnieńniaŭ u Padatkovy kodeks u častcy adniasieńnia zboru na finansavańnie dziaržaŭnych vydatkaŭ, uviedzienaha dekretam, da respublikanskich padatkaŭ, zboraŭ (pošlin), a taksama ŭ Kodeks ab administracyjnych pravaparušeńniach u častcy zamacavańnia administracyjnaj adkaznaści za niavypłatu abo niapoŭnuju vypłatu zboru.
«Kanstytucyjny sud pryjšoŭ da vysnovy, što takoje pravavoje rehulavańnie hruntujecca na pałažeńniach artykułaŭ 56 i 133 Kanstytucyi i nakiravanaje na vykanańnie abaviazku płacić zakonna ŭstanoŭlenyja padatki, pošliny i inšyja płaciažy», — havorycca ŭ paviedamleńni suda.
«Vypłata padatkaŭ, pošlin i inšych płaciažoŭ źjaŭlajecca biezumoŭnym patrabavańniem dziaržavy, što vynikajuć z kanstytucyjnaha abaviazku kožnaha prymać udzieł u finansavańni dziaržaŭnych raschodaŭ (artykuł 56 Kanstytucyi)», — dadali ŭ KS.
Kanstytucyjny sud taksama nie vyjaviŭ prabiełaŭ, kalizij i pravavoj niavyznačanaści, jakija majuć kanstytucyjna-pravavoje značeńnie i jakija źjaŭlajucca padstavaj dla raspačaćcia Kanstytucyjnym sudom spravy ab ich vyklučeńni.
