Aršanskaha aktyvista kampanii «Havary praŭdu» Ihara Hryšanava 15 sakavika vyzvalili ź izalatara časovaha ŭtrymańnia, u jakim jon znachodziŭsia troje sutak. Pra heta pravaabaroncam stała viadoma z paviedamleńnia miascovaj aktyvistki.
Fota Paliny Ściepanienki
Raniej u ŚMI paviedamlałasia, što ŭ dačynieńni da Hryšanava pravodziacca śledčyja dziejańni, jaho dapytvajuć u miežach niejkaj kryminalnaj spravy. Tolki siońnia, pa vyzvaleńni, stała viadoma, što suprać aktyvista zaviedziena kryminalnaja sprava pa č.1 artykuła 211 Kryminalnaha Kodeksu (prysvajeńnie albo rastrata majomaści).
Siabry Ihara Hryšanava źviazvajuć zatrymańnie z tym, što Ihar moh by ŭziać udzieł u «Maršy niedarmajedaŭ», jaki prajšoŭ u Oršy 12 sakavika. Ale jon raptoŭna źnik na druhi dzień.
7 sakavika nieviadomyja asoby ažyćciavili napad na siadzibu ŭ Staŭrach, jakaja naležyć aktyvistu. Złamyśniki ŭzłamali zamki i patrapili ŭ pamiaškańnie. Źnikli tolki dakumienty, jakija tyčylisia hramadskaj dziejnaści aktyvista. A 11 sakavika śledčyja zaviali kryminalnuju spravu, u miežach jakoj i zatrymlivaŭsia Hryšanaŭ. Na ahrasiadzibie ŭ Staŭrach viaducca śledčyja dziejańni, nakładajecca aryšt na majomaść.
