Alaksandr Łukašenka pryznačyŭ Usievałada Jančeŭskaha dyrektaram Administracyi Parku vysokich technałohij. Da hetaha Usievaład na praciahu dzieviaci hadoŭ zajmaŭ pasadu pamočnika prezidenta pa pytańniach ideałohii.
«Naša Niva» zhadvaje staronki bijahrafii adnaho z samych prahresiŭnych i samych aściarožnych biełaruskich čynoŭnikaŭ.
bymedia.net
Vychadziec z «Słavianskaha saboru»
Usievaład Jančeŭski naradziŭsia ŭ 1976 hodzie ŭ Barysavie. Uvahu da siabie jon staŭ pryciahvać jašče školnikam. U 1992 hodzie ŭ haziecie «Respublika» źjaviŭsia pałasny list z prypiskaj ad redaktara «Chiba nie cikava, što 16-hadovy čałaviek dumaje pra naš čas?» Jančeŭski sumavaŭ ab raspadzie Savieckaha sajuza: «Volaj losu my akazalisia jurydyčna i palityčna izalavanyja ad Rasii», ale aŭtar spadziajecca, što hety razryŭ časovy. Było tam i pra žadańnie nacyjanał-demakrataŭ pryvieści Biełaruś «u pahibielnuju zaležnaść ad Zachadu».
Usievaład staŭ aktyvistam partyi Słavianski sabor «Biełaja Ruś». Toj samaj, kudy ŭvachodzili Siarhiej Kaścian, Juryj Azaronak i inšyja adyjoznyja ludzi. Ściah partyi byŭ čorna-žoŭta-bieły, jak u rasijskich manarchistaŭ. Jaje likvidavali ŭ 1999 hodzie. Partyja stajała na idejach ahulnaruskaha adzinstva.
Na vybarach 1994 hoda Słavianski sabor «Biełaja Ruś» padtrymlivaje Alaksandra Łukašenku, Jančeŭski stanovicca davieranaj asobaj kandydata ŭ prezidenty. U hety čas jon pačynaje adychodzić ad idej słavianstva.
Zrabiŭ Stanisłava Šuškieviča deputatam
Na vybarach u Viarchoŭny Saviet u 1995 hodzie Usievaład Jančeŭski niečakana stanovicca kiraŭnikom vybarčaha štabu Stanisłava Šuškieviča.
«Heta sprytny i adukavany čałaviek. Škody jon mnie nie narabiŭ, tamu ničoha kiepskaha pra jaho skazać nie mahu, — kaža Stanisłaŭ Šuškievič dla «NN». — U mianie jość słabaść: ja lublu talenavitych, pracavitych i prafiesijanalnych ludziej. I nie korpajusia ŭ ich pachodžańni, siamiejnych adnosinach i h.d. Jančeŭski zrabiŭ mianie deputatam. Pomniu, što jon rabiŭ časopis «Płanieta». Niakiepska rabiŭ, skažam prama. Paśla tych padziej siaredziny 1990-ch ja ź im nikoli nie kantaktavaŭ».
Na tych vybarach u Viarchoŭny saviet jašče pieramahali demakraty — Stanisłaŭ Šuškievič, Stanisłaŭ Bahdankievič, Andrej Klimaŭ i inšyja.
Procidziejničaŭ apazicyi, uznačaliŭ «łukamoł»
Kali Łukašenka staŭ prezidentam, to Jančeŭski zasnavaŭ arhanizacyju «Pramoje dziejańnie». Niekatoryja historyki nazyvajuć hałoŭnaj metaj hetaj arhanizacyi supraćdziejańnie vuličnym akcyjam apazicyi. Faktyčna heta była adzinaja arhanizacyja, jakaja była niejak zdolnaja na vuličnyja vystupy. Kažuć, što dla ŭ dakumientach dla ŭnutranaha karystańnia Jančeŭski navat ličyŭsia kiraŭnikom «Pramoha dziejańnia».
Naprykancy 1990-ch adbyvajecca znakavaja padzieja dla Jančeŭskaha — znajomstva sa starejšym synam kiraŭnika krainy Viktaram. U toj čas jany razam vučylisia ŭ BDU na fakultecie mižnarodnych adnosin. Kažuć, što ŭzvyšeńnie Usievałada jakraz i źviazanaje z postaćciu Viktara.
Mienavita tady paličyli, što Jančeŭski moža dobra spravicca z moładździu. Asabliva vyjhryšna jon hladzieŭsia na fonie amorfnaha Biełaruskaha sajuza moładzi. Pačynajecca stvareńnie masavaj moładzievaj arhanizacyi «Biełaruski patryjatyčny sajuz moładzi», jaki i ŭznačalvaje Jančeŭski. U narodzie hetuju strukturu nazavuć «łukamoł» za biezumoŭnuju padtrymku kiraŭnika krainy.
grodnonews.by
Małady deputat i redaktar
Jančeŭskamu ŭsiaho 24 hady, a jon užo stanovicca deputatam Pałaty pradstaŭnikoŭ. U 2000 hodzie jon abirajecca pa Słuckaj vybarčaj akruzie, tyja vybary bajkatavała apazicyja.
«U Słucku da hetaj pary pamiatajuć hlancavyja paštoŭki, jakija deputat dasyłaŭ da 8 Sakavika ŭsim žančynam horada, a na śviatočnych kancertach u miascovym DK kožnaj damie jon daryŭ hvaździk», — pisała pra Jančeŭskaha gazetaby.com.
U 2005 hodzie Jančeŭskaha pryznačajuć hałoŭnym redaktaram časopisa «Płanieta», u jakim beścilisia suśvietnyja zmovy, krytykavałasia Aranžavaja revalucyja, chapała krytyki biełaruskaj apazicyi. Časopis byŭ raźličany na mižnarodnuju tematyku.
Navat paśla sychodu Jančeŭski jašče doŭhi čas kuryravaŭ vydańnie, prymaŭ važnyja rašeńnie pa redakcyjnaj palitycy.
Kuryravaŭ internet
U krasaviku 2008 hoda Jančeŭski byŭ pryznačany pamočnikam Łukašenki pa pytańniach ideałohii. Jon pieražyŭ u Administracyi prezidenta Niavyhłasa, Makieja, Kabiakova, Kosinca. Možna skazać, što Jančeŭski byŭ adnym z tych, chto najbolš doŭha zajmaŭ vysokuju pasadu ŭ kiroŭnaj elicie. Adkul biarecca taki sakret doŭhažycharstva? U aściarožnaści i intelekcie.
Jančeŭski kuryravaŭ internet, Łukašenka nazyvaŭ jaho «naziralnikam» za internetam. Ale varta adznačyć, što pry Jančeŭskim internet byŭ i zastajecca svabodnym.
Varta adznačyć cikavy fakt, što ŭ 2008 hodzie pierad viartańniem «Našaj Nivy» i «Narodnaj voli» ŭ padpisnyja katałohi i kijoski sustreču z redaktarami pravodziŭ jakraz Usievaład Jančeŭski. Mienavita ad jaho supracoŭniki haziet daviedalisia, što jany znoŭ buduć u dziaržaŭnych sistemach raspaŭsiudu.
