Abjadnanaja hramadzianskaja partyja i partyja BNF atrymali papiaredžańni Miniusta za zaŭčasnaje anansavańnie akcyi pratestu na Dzień Voli. U vypadku paŭtornaha papiaredžańnia ŭłady pahražajuć apazicyjnym partyjam inšymi mierami adkaznaści. Pa zakonie — heta prypynieńnie dziejnaści abo likvidacyja partyi, piša Tut.by
Kopii listoŭ ad Miniusta partyja BNF raźmiaściła ŭ tvitary, a lidar AHP Anatol Labiedźka ŭ fejsbuku. Listy padpisanyja asabista ministram justycyi Aleham Śližeŭskim.
Fota z fejsbuka Anatola Labiedźki
U papiaredžańni havorycca, što «arhanizatary mierapryjemstva zaklikali hramadzian pryniać u im udzieł i ahučvali scenar praviadzieńnia hetaha mierapryjemstva». Takija dziejańni da atrymańnia dazvołu na zajaŭku zabaronienyja, adznačaje Miniust. Pradstaŭnikoŭ AHP i BNF, jakija byli zajaŭnikami akcyi na Dzień Voli, vinavaciać u parušeńni adrazu dvuch zakonaŭ — ab masavych mierapryjemstvach i ab palityčnych partyjach.
Miniust taksama zaznačaje, što ŭ vypadku paŭtornaha padobnaha parušeńnia viedamstva razhledzić inšyja miery adkaznaści da partyi. U adpaviednaści z zakonam «Ab palityčnych partyjach», takimi mierami mohuć być prypynieńnie dziejnaści partyi na termin da paŭhoda i likvidacyja partyi.
Anatol Labiedźka skazaŭ, što zaŭtra partyja na palitradzie razhledzić rašeńnie Miniusta i vyznačycca z reakcyjaj.
— Vidavočna, što heta inicyjatyva nie ministra justycyi, a palityčnaja zamova. Niahledziačy na adsutnaść sudovaj sistemy, budziem, chutčej za ŭsio, abskardžvać.
Nahadajem, zajaŭnikami akcyi pratestu na Dzień Voli akramia pradstaŭnikoŭ AHP i BNF byli aktyvisty ruchu salidarnaści «Razam», «Biełaruskaj chryścijanskaj demakratyi» i ruchu «Za svabodu». Z troch struktur tolki ŭ apošniaj jość rehistracyja.
Kiraŭnik «Za svabodu» Juraś Hubarevič raspavioŭ, što taksama atrymaŭ apaviaščeńnie, što na pošcie jaho čakaje zakazny list ad Miniusta. Palityk upeŭnieny, što tam anałahičnaje papiaredžańnie.
— Naturalna, budziem abskardžvać, heta poŭny absurd. Arhanizacyja nie niasie adkaznaść za dziejańni aktyvistaŭ. Čałaviek, jaki padaŭ zajaŭku, padavaŭ jak fizyčnaja asoba, a nie ad arhanizacyi. Jon moh być siabram i «Čyrvonaha kryža», i «Biełaj Rusi», i vieteranskaj arhanizacyi.
Adznačym, što razhladajučy zajaŭku na šeście pa praśpiekcie Niezaležnaści 25 sakavika, Minharvykankam prapanavaŭ zajaŭnikam źmienieny scenar akcyi tolki ŭviečary 24 sakavika, a nie za 5 dzion da akcyi. Pry hetym hienieralny prakuror Biełarusi Alaksandr Kaniuk zajaviŭ, što Minharvykankam «ničoha nie praterminavaŭ». Arhanizatary ŭ znak pratestu adklikali svaje podpisy, kiraŭnik Minska Andrej Šorac abviaściŭ lubyja akcyi 25 sakavika niezakonnymi. Sproba pravieści jaje skončyłasia žorstkim razhonam, sotniami zatrymańniaŭ i dziasiatkami administracyjnych aryštaŭ.
