Pavodle danych statystyčnaha viedamstva Litvy, biełarusy zajmajuć druhoje miesca pa ŭkładańniach u nieruchomaść krainy-susiedki. Ahulny košt kvater i damoŭ, nabytych biełarusami, aceńvajecca ŭ 28,4 młn jeŭra. Takija danyja pryvodzić dp.ru.
Popyt na nieruchomaść u Litvie skancentravany ŭ stalicy — Vilni. Niaznačny pracent ździełak ździajśniajecca ŭ Kłajpiedzie i Kaŭnasie, a taksama ŭ bujnych prymorskich haradach. Darečy, u Litvie zamiežniki mohuć nabyvać biez abmiežavańniaŭ lubuju nieruchomaść za vyklučeńniem ziamiel sielhaspryznačeńnia.
Pa słovach hienieralnaha dyrektara mižnarodnaha ahienctva nieruchomaści Gordon Rock Stanisłava Zinhiela, značnaja častka ździełak u Prybałtycy prypadaje na abjekty koštam ad 100 tys. da 300 tys. jeŭra.
Dola zamiežnych pakupnikoŭ na rynku žylla Vilni składaje nie bolš za 10%. Košt elitnych kvater u centry litoŭskaj stalicy varjirujecca ad 200 tys. da 1 młn jeŭra, u zaležnaści ad płoščy. Ceny na pryvatnyja damy pačynajucca ad 450 tys. jeŭra i dachodziać da 2 młn jeŭra.
Papularnaść nieruchomaści ŭ Vilni litoŭskija ryełtary tłumačać tym, što prybałtyjskija krainy tradycyjna źjaŭlajucca miescam biznes-imihracyi. Raźmieščanuju ŭ ich nieruchomaść kuplajuć zamožnyja hramadzianie, jakija majuć biznes u Jeŭropie i tyja, što spadziajucca kali nie za košt nieruchomaści, to inšym sposabam lehalizavacca ŭ jeŭrapiejskaj krainie i ŭ dalejšym vykarystoŭvać nabytuju nieruchomaść dla pražyvańnia.
