Biełaruś viernie niedapłačanuju sumu za rasijski haz «dačce» «Hazproma», rasijskaja kampanija daść źnižku, jaje pamier «Hazprom» abmiarkuje sa svaim biełaruskim partnioram u bližejšy čas, paviedamiŭ žurnalistam vice-premjer RF Arkadź Dvarkovič.
«Ličbu nie nazaviom, ale mahu jašče raz paćvierdzić, što damovilisia ab tym, što na peŭnych umovach buduć skarekciravany niekatoryja mižuradavyja dakumienty, jakija datyčacca ŭzajemaadnosin u śfiery hazu i nafty, što paśla ich parafiravańnia biełaruski bok viernie niedapłačanuju sumu dačce «Hazproma», što my adnovim pastaŭki nafty ŭ abjomie 24 miljony ton, što «Hazprom» padaść źnižku ŭ vyhladzie panižalnaha kaeficyjenta da formuły, źviazanaj z canoj, pačynajučy z 2018 pa kaniec 2019 hoda», — zajaviŭ žurnalistam Dvarkovič.
«Adnaŭleńnie pastavak nafty pačniecca ŭžo bolš-mienš sinchronna z vypłataj niedapłačanaj sumy ŭ 726 młn dalaraŭ, bolš za 720 młn, davajcie tak. Heta dazvolić našym biełaruskim partnioram atrymać peŭnyja vyhady», — cytuje słovy Dvarkoviča TASS.
«Pamier nie nazavu, heta ŭžo budzie «Hazprom» nazyvać», — skazaŭ Dvarkovič, adkazvajučy na pytańnie ab pamiery źnižki.
Jon dadaŭ, što pamier źnižki budzie vyznačany ŭ kamiercyjnych dakumientach «Hazproma» sa svaimi partniorami. «Ja dumaju, što jany heta zrobiać u bližejšy čas», - zaŭvažyŭ jon.
