Arciom Baściuk prasłužyŭ u armii paŭhoda. Da trahiedyi jaho baćki pryjazdžali ŭ vajskovuju častku parazmaŭlać z kiraŭnictvam pra niestatutnyja adnosiny. Im paabiacali razabracca, supakoili. Uviečary 30 sakavika Arciom patelefanavaŭ rodnym, kab raźvitacca, ranicaj nastupnaha dnia jaho nie stała. Zaraz Śledčy kamitet pravodzić daśledčuju pravierku pa fakcie śmierci maładoha čałavieka.
Fota Siarhieja Hudzilina
— Ja viedaju svajho syna, u jaho nikoli raniej nie było suicydalnych schilnaściaŭ. Pa pryrodzie jon miakki čałaviek, muraški nikoli nie rastaptaŭ. Kali b ja moh vykazać zdahadku, što ŭsio tak skončycca, sam by zabraŭ jaho dadomu, i nijakija b trybunały nie spałochali, — raspaviadaje TUT.BY Siarhiej Alaksandravič, baćka zahinułaha Arcioma Baściuka.
Ranicaj 31 sakavika baćkam Arcioma patelefanavali z vajskovaj čaści 25 849 Barysava i paviedamili: ich syna bolš niama ŭ žyvych. Minčuka pryzvali ŭ armiju vosieńniu 2016 hoda, chłopiec skončyŭ Mižnarodny dziaržaŭny ekałahičny instytut imia Sacharava i pavinien byŭ adsłužyć hod.
— Pieršy miesiac da prysiahi usio było dobra, nam jašče tady skazali: «Voś bačycie, dziedaŭščyny niama». A kali ich pieraviali da starasłužačych, usio źmianiłasia, Arciom byŭ biez nastroju, na ŭsie pytańni adkazvaŭ: «A što raskazvać? Dziedaŭščyna — i ŭsio», — uspaminaje Taćciana, mama Arcioma.
Rodnyja sałdata robiać akcent: syna nichto nie biŭ, ale ŭvieś čas na Arcioma akazvali psichałahičny cisk.
— Syn raskazvaŭ, što «dziady» prymušali maładych poŭnaściu ich zabiaśpiečvać: kuplać kavu, cukar, cyharety. Sami hrošy ŭ ruki nie brali, ale kamandy addavali. Nie dazvalali spać, prymušali siadzieć ci stajać kala łožka, a kali niechta zaśnie, padychodzili i pieravaročvali łožak razam z sałdatam.
Ci raptam nočču kamuści zachaciełasia šakaładu, treba prynieści, kali admaŭlaješsia — adciskacca 100, 200, 400 razoŭ. Kali my heta daviedalisia, źviazalisia z kamandziram častki, jon prapanavaŭ pryjechać. Heta było za try tydni da hibieli syna. Nas vysłuchali, spačatku nie pavieryli, a potym paabiacali razabracca, — raspaviadaje TUT.BY Taćciana.
Na hetuju ž hutarku paklikali i samoha sałdata, jon nazvaŭ proźviščy i imiony tych, chto prymušaŭ jaho žyć nie pavodle statutu. Zaraz baćki pra heta škadujuć. Ličać, što na Arcioma stali cisnuć jašče bolš. Uviečary 30 sakavika byŭ dziŭny zvanok z častki, Arciom prasiŭ prabačeńnia ŭ mamy z tatam, raźvitaŭsia ź imi. Pierapałochanyja baćki tut ža źviazalisia z kiraŭnictvam.
— Nam abiacali, što za synam pahladziać, usio budzie dobra, a praz 12 hadzin Arcioma nie stała. Jak ža tak? Žonka prasiła dać psichołaha, z synam nichto nie hutaryŭ. Ciapier budziem damahacca, kab vinavatyja ŭ śmierci Arcioma byli pakaranyja, — kaža Siarhiej Alaksandravič.
Pavodle aficyjnaj infarmacyi, kryminalnaja sprava nie zavodziłasia, zatrymanych niama.
— Pravodzicca daśledčaja pravierka pa fakcie abstavinaŭ śmierci vajskoŭca terminovaj słužby. Papiarednija dadzienyja, atrymanyja ŭ chodzie pieršapačatkovych mierapryjemstvaŭ, dajuć padstavy razhladać u jakaści asnoŭnaj viersii suicyd. Śledstvam pravodzicca kompleks mierapryjemstvaŭ, nakiravanych na ŭstalavańnie ŭsich abstavinaŭ taho, što adbyłosia, u tym liku pryčyny i matyvy, jakija pryviali da takich namieraŭ, — paviedamiła TUT.BY Taćciana Biełanoh, aficyjny pradstaŭnik upraŭleńnia Śledčaha kamiteta pa Minskaj vobłaści.
U samim Ministerstvie abarony admovilisia kamientavać i samu trahiedyju, i toje, što baćki sałdata ŭzdymali pytańnie ab dziedaŭščynie.
— My nie kamientujem ŭsie vypadki, źviazanyja z suicydalnymi pavodzinami, i pa etyčnych mierkavańniach ličym heta niemetazhodnym. Toje, što pravodzicca pravierka, heta fakt, — zajaviŭ Uładzimir Makaraŭ, načalnik upraŭleńnia infarmacyi hałoŭnaha ŭpraŭleńnia ideałahičnaj raboty Ministerstva abarony.
