Błohachostynh LiveJournal 4 krasavika ŭvioŭ novaje pahadnieńnie karystalnika. Kab praciahnuć karystacca servisam, błohiery pavinny jaho pryniać, piša Mieduza.
U pahadnieńni źjaviłasia zabarona na raźmiaščeńnie palityčnaj ahitacyi ŭ błohach. U punkcie 9.2.7 havorycca, što nielha «raźmiaščać rekłamu i/ci palityčnuju ahitacyju, kali inšaje śpiecyjalna nie ŭstanoŭlena asobnym pahadnieńniem pamiž karystalnikam i administracyjaj».
Pry hetym, vidać, zabarona nie raspaŭsiudžvajecca na niepalityčnuju rekłamu: u punkcie 12.4 zhadvajecca «raźmiaščeńnie karystalnikam <…> kantentu rekłamnaha charaktaru» biez ukazańnia taho, što heta parušaje praviły.
Pa novym pahadnieńni karystalniki nie mohuć rehistravacca ad imia inšaj asoby i «ŭvodzić karystalnikaŭ u zman adnosna svajej asoby, abo svaich adnosin ź inšymi asobami». Adkaznaść za kamientary niasuć i aŭtar kamientara, i aŭtar dziońnika, u jakim jon byŭ raźmieščany.
Taksama dakumient zabaraniaje rehistravacca asobam małodšym za 14 hadoŭ i papiaredžvaje, što błohi z aŭdytoryjaj bolš za try tysiačy karystalnikaŭ u sutki padpadajuć pad patrabavańni «zakona ab błohierach». Kali dziońnik byŭ nieaktyŭny paŭhoda, jaho mohuć vydalić, havorycca ŭ pahadnieńni.
Administracyja ŽŽ anansavała źmieny tak: «U palitycy «Žyvoha Žurnała» ŭ častcy viadzieńnia błohaŭ, a taksama pryvatnaści i zachavanaści danych karystalnikaŭ pryncypovych źmianieńniaŭ nie adbyłosia». Nijakich padrabiaznaściaŭ ab zabaronie na palityčnuju rekłamu i inšych pałažeńniach pahadnieńnia ŭ anonsie nie pryvodzicca.