Ministerstva infarmacyi abnaviła Respublikanski śpis ekstremisckich materyjałaŭ. Ź minułaha hoda jon pavialičyŭsia ŭ abjomie amal u 4 razy. Tradycyjna siudy trapili pradmiety z nacysckaj simvolikaj i relihijnaja litaratura, ale jość taksama pieśni futbolnych fanataŭ i publikacyi anarchistaŭ u siecivie. Dakumient apublikavała vydańnie «SB. Biełaruś siehodnia». TUT.BY vyvučyŭ abnaŭleńni za 2016 i 2017 hod.
Śpis zabaronienych u Biełarusi materyjałaŭ papoŭniŭsia jašče adnym vydańniem knihi Hitlera Mein Kamph, taksama pryznanaje ekstremisckim pa rašeńni suda videa pad nazvaj «Partyja Hitlera».
U śpis uniesienyja roznyja pradmiety z nacysckaj simvolikaj. Naprykład, znački sa svastykaj i nadpisam Deutsches Rotes Kreuz (što padobna da broški miedsiastry niamieckaha Čyrvonaha Kryža); dekol, to bok malunak dla druku na kieramicy, z arłom, svastykaj i trykałoram Viermachta. Ekstremisckaj pradukcyjaj pryznanyja supavaja talerka i spodak, a taksama dźvie kaski — na ich majecca svastyka.
Pa rašeńni sudoŭ Minska ŭ śpis uniesienyja knihi pra isłam i pravasłaŭje, antysiemityzm i admaŭleńnie Chałakosta.
U čornym śpisie jość i muzyka. Naprykład, pieśnia «Jeŭropa IV Rejch» abo kampazicyja, dzie miełodyja kambinujecca z vystupam Musalini na italjanskaj movie. Jość i zabaronienyja ź listapada 2016-ha słovy pieśni «Vmiestie viesieło šahať po bołotam, po bołotam s pulemietom.». Jaje vykonvali fanaty minskaha «Dynama» i inšych kłubaŭ, choć hetaja kampazicyja na matyŭ dziciačaj pieśni viadomaja jašče z časoŭ SSSR.
Pryznanyja ekstremisckimi dziasiatki aŭdyjozapisaŭ, jakija raspaviadajuć ab dziejnaści ŭkrainskich nacyjanalistyčnych hrupovak, a taksama ich atrybutyka (u jakoj majucca elemienty nacysckaj simvoliki).
Jość u śpisie videa, u naźvie jakoha zhadanaje žorstkaje zabojstva ŭdzielnika bajavych dziejańniaŭ va ŭkrainskim siale Šyrokina.
Taksama sud Centralnaha rajona Minska vosieńniu 2016-ha, i ŭžo ŭ sakaviku 2017-ha pryznaŭ ekstremisckimi materyjały anarchisckaha tołku, jakija źjavilisia na sajtach biełaruskaha ruchu i ŭ sacsietkach. U śpis trapili siarod inšaha instrukcyi anarchistaŭ dla padpału mašyny, udziełu ŭ masavych pratestach; aŭdyjo na YouTube ab akcyjach «suprać dziaržaŭnaj prapahandy» ŭ Minsku i inšym.
U śpisie fihuruje sajt «Sputnik i pohrom», materyjały jakoha sud Centralnaha rajona Minska pryznaŭ ekstremisckimi ŭ śniežni 2016-ha. Nahadajem, sa studzienia Mininfarm abmiežavaŭ dostup da hetaha resursu, jaki pazicyjanuje siabie jak sajt ruskich nacyjanalistaŭ.
Z pačatku 2017 hoda sudy Biełarusi taksama zabaranili siarod inšaha brašuru «Źnikłyja ludzi ŭ Biełarusi» (rašeńnie suda Małaryckaha rajona ŭ studzieni), vyjavu pamieram 6 na 8 santymietraŭ z kopijaj fota, dzie «na piarednim płanie nachileny čyrvony vazok z hnojem i płakatam, prabitym viłami» (rašeńnie suda Homielskaha rajona ŭ studzieni). A jašče nalepka z nadpisam «Kuriš ta pješ? Švidšie pomrieš! Trimaj krov čistoju» (sud Kastryčnickaha rajona Minska ŭ lutym) i inšaje.
