Aryštavany Viktar Daniłaŭ pracavaŭ u pryvatnaj firmie i, adnačasova, nastaŭnikam dapryzyŭnaj padrychtoŭki ŭ adnoj ź minskich škoł.
Ničoha padobnaha raniej nie byvała. Pa abvinavačańni ŭ «padrychtoŭcy masavych biesparadkaŭ» — nie biesparadkach samich, a tolki nibyta ich padrychtoŭcy — było aryštavana try dziasiatki ludziej, pryčym častka ich — supracoŭniki roznych siłavych struktur. Toje było zroblena za paru dzion da Dnia Voli, kali apazicyja zaklikała da praviadzieńnia ŭ Minsku masavaj demanstracyi pratestu suprać Alaksandra Łukašenki.
Što, unutry krainy vyśpieła zmova z metaj źmieny isnujučaha ładu?
Dziasiatku aryštavanych užo vystavili abvinavačańni.
«Naša Niva» sabrała ŭsio viadomaje pra dziejnaść tych, kaho nazyvajuć «bajevikami».
Čamu radykały?
U farmuloŭkach dziaržaŭnych ŚMI zatrymanyja — «bajeviki».
Miž tym vartych davieru dokazaŭ ich radykalizmu nie prahučała.
Isnavaŭ fejkavy zaklik padniacca na «ŭzbrojenuju baraćbu z režymam» ad imia «Biełaha lehijona» — takoje paviedamleńnie źjaviłasia na ŭzłamanaj staroncy žychara Minska Mirasłava Łazoŭskaha ŭ fejsbuku, jon pra heta zajaviŭ i adchryściŭsia ŭ toj ža dzień.
Byŭ pakazany taksama «schron armatury» ŭ Nalibockaj puščy — śmiešny fakt, kali «masavyja biesparadki» nibyta płanavalisia ŭ Minsku (a tam pracujuć dziasiatki mietałabaz, dzie tabie takoj armatury za dziesiać chvilin narežuć poŭny furhon).
Isnuje jašče zapis nibyta praryvu z Ukrainy džypa sa zbrojaj — ale nichto nie bačyŭ ni zatrymanych u tym džypie, ni z ukrainskaha boku toj džyp nie vyjazdžaŭ, što dało padstavy ŚMI ŭsumnicca ŭ realnaści fakta «praryvu».
Sa zbroi ŭ aryštavanych pa «spravie patryjotaŭ» na momant zatrymańnia znajšli, jak paviedamlałasia, palaŭničyja karabiny i ružžy (lehalnyja) i pnieŭmatyku (taksama dazvolenuju).
Dyk «Bieły lehijon» ci nie?
Pa infarmacyi «Našaj Nivy», «Bieły lehijon» sapraŭdy spyniŭ svajo isnavańnie jak struktura jašče na pačatku 2000-ch. Ale jaho ideja — vychavańnie patryjotaŭ Biełarusi dla słužby radzimie (u ideale — u siłavych strukturach) — zastałasia žyć. Jana vyražałasia ŭ tym liku ŭ praciahu raboty z moładździu. Uzoram byŭ letnik «Patryjot» pad Babrujskam, dzie školnikaŭ vučyli elemientam pracy sa zbrojaj na ŭzor školnych urokaŭ dapryzyŭnaj padrychtoŭki. Heta ŭsio spałučałasia z ŭrokami biełaruskaj movy, historyi i kultury.
Niemahčyma vychavać patryjota Biełarusi biez movy i historyi, ličyli hetyja ludzi.
«Da palityki stavilisia «chutčej abyjakava», — skazali nam ludzi, blizkija da zatrymanych.
I pryčyny tut jasnyja — palityki ŭ Biełarusi niama.
Chtości syšoŭ u biźnies, chtości pajšoŭ na słužbu.
Pa słovach inšaha byłoha «lehijonaŭca», jaho byłyja siabry «nie imknulisia źmianić isnuju sistemu kaardynat, a adaptavalisia da jaje».
Vajennuju i milicejskuju akademiju za časy niezaležnaści skončyli dziasiatki vychavancaŭ «Patryjota», i dziasiatki jašče skončać, bo «na letnikach šmat chto z małych vykazvaŭ žadańnie tudy pastupać».
Ale vychavaŭčaja praca viałasia nie tolki ź dziećmi.
Palavyja vychady
Udzielničali ŭ dziejnaści letnikaŭ nie tolki padletki, ale i darosłyja mužčyny, kštałtu vyratavalnika Dundukova i śpiecnazaŭca Dukšta.
Dla kahości ź ich heta była vypadkovaść, ale dla niekatorych — śviadomy vybar. Šturškom dla trecich stała akupacyja Kryma i vajna na Danbasie — patryjoty dapuskali, što Rasija rana ci pozna pasprabuje likvidavać dziaržaŭnaść Biełarusi.
U hutarkach chłopcy pryznavali, što ŭ vypadku ahresii suprać Biełarusi jany hatovyja stać kaściakom dobraachvotnickaha bataljona. Jany cytavali słovy Łukašenki, što «ŭ vypadku čaho ŭra-patryjoty pojduć u ataku pieršymi, damo mahčymaść».
Padrychtoŭka była surjoznaj: instruktary sa śpiecnaza, abaviazkovyja miedycynskija kursy i atrymańnie siertyfikataŭ «Čyrvonaha kryža», stralba sa spartovaj i palaŭničaj zbroi (u adviedzienych dla hetaha miescach i pry instruktary), zaniatki adzinaborstvami.
Adpracoŭvałasia taksama aŭtanomnaje žyćcio ŭ partyzanskich umovach u farmacie palavych vychadaŭ, z načoŭkami i biez.
Pavodle našych acenak, za apošnija hady praz treniroŭki byłych «lehijanieraŭ» prajšli sotni čałaviek. Heta, darečy, pakazvaje, što patryjotaŭ u siłavych strukturach bolš, čym mnohija dumajuć.
Nielha vyklučać, što niekatoryja z zatrymanych «lehijanieraŭ» mieli sustrečy va Ukrainie ź biełarusami z dobraachvotnickich bataljonaŭ. Prynamsi, fakt, što mnohija z «lehijanieraŭ» byvali va Ukrainie. Ale nivodzin «lehijanier» nie jeździŭ tudy vajavać. Kali b taki fakt byŭ, jaho b užo ahučyli.
«U Biełarusi tut usio na dałoni. Idziom my ŭ kamuflažy na turbazu ŭ Puščy, a pa prychodzie nam kažuć, što ŭžo viedali, što da ich iduć ludzi ŭ kamuflažy», — skazaŭ nam čałaviek, jaki braŭ udzieł u palavych vychadach starejšaha składu «Lehijona».
Kazaŭ jon heta da taho, što ničoha nielehalnaha ci zabaronienaha ŭ ich dziejnaści jon nie bačyŭ.
Takija treniroŭki — zaviadzionka dla luboha strajkbolnaha, chardbolnaha ci piejntbolnaha kłuba.
Zrešty, palaŭničych u našych lasach chodzić bolej, čym «lehijonaŭcaŭ».
I pryšyty da ich Daškievič
Asobnaj uvahi zasłuhoŭvaje adnačasovy z «lehijanierami» aryšt Źmitra Daškieviča i maładafrontaŭcaŭ. U dziejnaści «Patryjota» MFaŭcy ŭdziełu nie brali, mienavita tamu, što «Patryjot» i «Bieły lehijon» uchilalisia ad palityki. Aryšt siemiarych maładafrontaŭcaŭ — i nastupnaje takoje ž vyzvaleńnie čatyroch — možna patłumačyć tolki palityčnymi pryčynami.
Isnavaŭ vajskova-patryjatyčny kłub «Vajar» z udziełam MFaŭcaŭ, ale heta nie vychodziła za ramki strajkbolnych trenirovak.
Pakul sprava Daškieviča ničym nie adroźnivajecca ad jahonaj ža spravy ŭzoru 2010 hoda, pa vynikach jakoj jon byŭ pryznany suśvietnaj supolnaściu palityčnym viaźniem.
Fakt i vydumki
Padsumoŭvajučy, možna skazać nastupnaje.
Pamiatajecie našy rasśledavańni pra łahiery, dzie ŭdzielniki vykidvajuć ruku ŭ nacysckim vitańni ci režuć hałovy sabakam, jak rabiŭ rasijski nieanacyst Alaksiej Milčakoŭ? Darečy, kryminalnyja spravy pa faktach udziełu biełarusaŭ u tych łahierach zaviedzienyja nie byli.
Dyk voś, nivodnaha padobnaha dyskredytujučaha fota ci videa z udziełam «biełych lehijanieraŭ» nie vystaŭlena.
Što biełaruskija patryjoty hurtavalisia, rychtavalisia być «abaroncami Ajčyny» i rychtavali moładź da hetaha — fakt.
Ale što jany «rychtavali biesparadki» abo što isnavała niejkaja zmova miž imi z metami, jakija vychodziać za aficyjna dekłaravanyja, — my takich faktaŭ nie znajšli.
Pakul vyhladaje, što prydumanaja zmova była patrebnaja adzina dla taho, kab źbić chvalu pratestaŭ, što narastała ŭ sakaviku. Zmahańnie z chimierami radykałaŭ, adnak, dało hramadstvu sihnał, što nie tolki biełaruski nacyjanalizm, ale i nacyjanalny patryjatyzm nie vitajecca i moža vyklikać represii z boku KDB. I heta ŭvachodzić u supiarečnaść ź niadaŭniaj zaŭvahaj Alaksandra Łukašenki, što «zdarovy nacyjanalizm» — heta narmalna i navat patrebna.
Śpis zatrymanych pa spravie «ab padrychtoŭcy masavych biesparadkaŭ» pavodle (pa infarmacyi PA «Viasna»; mahčyma, niapoŭny):
Abramaŭ Alaksiej Anatoljevič, 1979 hoda; znachodzicca ŭ SIZA KDB. Abvinačvańnie pa č.3 art. 293 KK RB.
Barstok Siarhiej Piatrovič
Bialaŭski Andrej Valerjevič; u SIZA KDB. Abvin. pa č.3 art. 293.
Hrek Illa Hienadźjevič, 1992 h.n., pamiežnik, Smarhoń.
Huryn Juryj Jaŭhienavič; znachodzicca ŭ SIZA1.
Daniłaŭ Viktar Kanstancinavič. U SIZA KDB.
Daškievič Źmicier Viačasłavavič. U SIZA1. Vystaŭlena abvinavačvańnie pa č.3 art. 293.
Dukšt Viačasłaŭ Aleksandravič 19.04.1992 h.n. Marjina Horka. Śpiecnazaviec.
Dundukoŭ Andrej Viačasłavavič, 1985 h.n.. U SIZA KDB.
Zimnicki Alaksandr Antonavič. U SIZA KDB.
Kavalčuk Ivan Viktaravič. U SIZA KDB, abvinavačvańnie pa č.3 art. 293.
Komlik-Jamacin Andrej Viačasłavavič. U SIZA KDB.
Kuncevič Siarhiej Uładzimiravič. U SIZA KDB.
Łazoŭski Mirasłaŭ Uładzimiravič, 1973 h.n.. U SIZA KDB. Vystaŭlena abvinavačvańnie pa č.3 art. 293.
Maroz Viktar Hienadzievič. U SIZA KDB.
Michalkoŭ Mikałaj Mikałajevič, kiraŭnik kłuba «Patryjot», Babrujsk. U SIZA KDB.
Michalkoŭ Jan Mikałajevič (syn kiraŭnika babrujskaha «Patryjota»), vajskoviec. U SIZA KDB.
Novik Dźmitryj Mikałajevič. U SIZA KDB.
Pałtaržycki Jaŭhien Kanstancinavič, 1987 h.n. U SIZA KDB, Vystaŭlena abvinavačvańnie pa č.3 art. 293.
Palčeŭski Siarhiej Alaksandravič. U SIZA1. Abvinavačvańnie pa č.3 art. 293 KK RB.
Paškievič Cimur. U SIZA KDB.
Rumiancaŭ Uładzimir Alaksandravič. U SIZA KDB, vystaŭlena abvin. pa č.3 art. 293.
Strybulski Siarhiej Siarhiejevič, u SIZA KDB. Vystaŭlena abvin. pa č.3 art. 293.
Jaŭdacha Alaksandr Anatoljevič, 1975 h.n.. U SIZA-1, vystaŭlena abvinavačvańnie pa č.3 art. 293.
Adrasy turmaŭ, na jakija možna pasyłać piśmy ci adpraŭlać telehramy:
SIZA KDB 220050, abanienckaja skrynia 8, proźvišča, imia i imia pa baćku aryštavanaha
SIZA №1, vuł. Vaładarskaha, 2, h. Minsk, 220030, proźvišča, imia i imia pa baćku aryštavanaha
