Abałonski sud Kijeva vynies prysud 12 bajcam dobraachvotnickaj śpiecroty milicyi «Tarnada». Siarod asudžanych i biełarus Daniła Lašuk (Madžachied). Pra heta na svajoj staroncy ŭ fejsbuku paviedamiŭ hałoŭny vajenny prakuror Ukrainy Anatol Macios.

Kamandzir «Tarnada» Rusłan Aniščanka atrymaŭ 11 hadoŭ pazbaŭleńnia voli, jaho namieśnik Mikałaj Cukur — dzieviać hadoŭ, bajec Daniła Lašuk, viadomy taksama jak Madžachied, asudžany na 10 hadoŭ.

Jašče adzin bajec atrymaŭ dzieviać hadoŭ i šeść miesiacaŭ, try bajcy atrymali pa dzieviać hadoŭ, adzin — vosiem hadoŭ, astatnija čaćviora atrymali piacihadovyja ŭmoŭnyja terminy.

«My pavažajem rašeńnie Abałonski rajsudu, ale nami paśla analizu prysudu i vyvučeńnia dadzienaha prysudu budzie padadzienaja apielacyjnaja skarha ŭ Apielacyjny sud horada Kijeva. My ličym, što vielmi miakkaje pakarańnie pa hetym abvinavačvańni», - zajaviŭ u efiry «112 Ukraina» prakuror Hałoŭnaj vajskovaj prakuratury Rusłan Kraŭčanka.

Sudovy praces doŭžyŭsia niekalki miesiacaŭ i prachodziŭ u zakrytym režymie. Byłych bajcoŭ «Tarnada», jakija apynulisia na łavie padsudnych, abvinavacili ŭ vykradańni i katavańni miascovych žycharoŭ u pryharadzie Lisičanska ŭ Łuhanskaj vobłaści, u maradziorstvie i hrupavym zhvałtavańni mužčyny.

Prakurory i sudździ, jakija viaduć praces, padviarhalisia kałasalnamu cisku z boku hramadskaści. Kala budynka suda prychilniki kambata, nie zhodnyja ź jaho aryštam, ładziać sutyčki z sałdatami Nacyjanalnaj hvardyi. Ich padtrymlivali niekatoryja deputaty Viarchoŭnaj rady.

Lašuka ŭkrainskija pravaachoŭnyja orhany šukali bolš za dva miesiacy. Jaho zatrymali ŭ haściničnym kompleksie pad Kijevam. Lašuka abvinavacili ŭ ździajśnieńni ciažkich i asabliva ciažkich złačynstvaŭ u składzie złačynnaj arhanizacyi ź liku rabotnikaŭ milicyi roty patrulna-pastavoj słužby «Tarnada».

«Mienavita Madžachied-Lašuk z nadzvyčajnym cynizmam i dziorzkaściu, žorstkaściu i biaźlitasnaściu ździajśniaŭ najbolš žorstkija katavańni miascovaha nasielnictva Łuhanskaj vobłaści, arhanizoŭvaŭ i braŭ niepasredny ŭdzieł u zhvałtavańni zatrymanych, jakich jon razam ź inšymi padazravanymi vykradaŭ z karyślivych mierkavańniaŭ», — raspavioŭ na svajoj staroncy ŭ Facebook hałoŭny vajskovy prakuror Ukrainy Anatol Macios.

Dobraachvotnicki bataljon «Tarnada» byŭ stvorany ŭ kastryčniku 2014 hoda ŭ składzie MUS Ukrainy. 18 červienia minułaha hoda ministr unutranych spraŭ Arsien Avakaŭ padpisaŭ zahad ab jaho rasfarmiravańni.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?