U sacyjalnych sietkach aburylisia pavodzinami piersanału načnoha kłuba Rich Cat, jaki admoviŭsia prapuścić usiaredzinu maładoha čałavieka na invalidnaj kalascy.
Skandalnaja historyja raskruciłasia paśla taho, jak žychar Lidy Arciom Najdzion pryjechaŭ u Minsk sa svajoj žonkaj.
- My z žonkaj pajechali ŭ hości da našaj siabroŭki, - raspavioŭ jon «Salidarnasci». - Razam my adznačali dzień naradžeńnia, a potym vyrašyli pajechać u kłub. Akramia nas byli jašče dźvie dziaŭčyny i dva chłopcy.
U vyniku kampanija adpraviłasia ŭ načnuju ŭstanovu Rich Cat, jakaja adčyniłasia na miescy viadomaha kłuba «Reaktar»:
- My byli prystojna apranutyja, vietliva razmaŭlali. Ale achoŭnik skazaŭ nam: viedajecie, u nas tut pandusa niama, tamu ja vas nie prapušču. Ja adkazaŭ, što ničoha strašnaha, bo sa mnoj dva siabry, jakija, kali što, mnie dapamohuć — pa leśvicy padniacca abo spuścicca. Na što jon adkazaŭ: nie.
Pa słovach surazmoŭcy, kali jany razam z žonkaj paprasili zaprasić administratara, achoŭnik patłumačyŭ, što jon i jość administratar kłuba.
Paśla maładyja ludzi pakinuli zapis u knizie skarhaŭ i byli vymušanyja adpravicca ŭ inšuju ŭstanovu, dzie achova była vietlivaja i navat prapanavała Arciomu biaspłatny ŭvachod.
- Zvyčajna ludzi naadvarot imknucca być vietlivymi: sustrakajuć, dapamahajuć. Nichto nie kidajecca, a, naadvarot, chočuć padtrymać. Nikoli raniej z takim nie sutykaŭsia, — prakamientavaŭ situacyju Arciom Najdzion.
Historyja atrymała praciah, kali pra incydent daviedaŭsia tavaryš Arcioma - kiraŭnik Lidskaha tavarystva invalidaŭ-kalasačnikaŭ Saša Aŭdzievič, jaki vyrašyŭ zastupicca za jaho.
— Kali ja daviedaŭsia, što tam adbyłosia, to znajšoŭ u fejsbuku staronku hetaha kłuba i napisaŭ paviedamleńnie. Skazaŭ, što pakul nie budu ničoha publikavać, prapanavaŭ abmierkavać situacyju, pakolki chacieŭ pačuć ich mierkavańnie, — raspavioŭ padrabiaznaści taho, što adbyłosia, surazmoŭca «Salidarnasci».
U adkaz na heta hramadski aktyvist atrymaŭ nieadnaznačnaje paviedamleńnie, jakoje paźniej apublikavaŭ na svajoj staroncy ŭ sacyjalnaj sietcy.
Krynica: staronka Sašy Aŭdzieviča ŭ Fejsbuku.
Pa słovach Sašy Aŭdzieviča, pradstaŭnik kłuba arhumientavaŭ svaje pavodziny tym, što va ŭstanovie nibyta «vialikija čerhi pa 300 čałaviek, i mnohich ź ich nie puskajuć».
Reakcyja hramadskaści: «Nu i fanaberyja ŭ ludziej!»
U sacsietkach incydent užo atrymaŭ šyroki rezanans. Mnohija karystalniki aburanyja jak pavodzinami piersanału kłuba, tak i manieraj, u jakoj kłub adreahavaŭ na zaŭvahu Sašy Aŭdzieviča. Padajom vybranaje z Facebook.
«Boža, a niepiśmiennaść kakaja!».
«Na Ibicy ŭ kłubach pa niekalki tysiač čałaviek — i nijakich abmiežavańniaŭ dla małaruchomych hramadzian».
«Nu i fanaberyja ŭ ludziej!»
«Takaja voś elita».
Pradstaŭnik kłuba: maładych ludziej nie puścili pa inšaj pryčynie
Z karespandentam «Salidarnasci» źviazaŭsia mužčyna, jaki pradstaviŭsia staršym administrataram kłuba Rich Cat, pry hetym admoviŭšysia nazvać svajo imia.
— My praviali ŭnutranaje rasśledavańnie z nahody hetaha vypadku, — skazaŭ jon. — I na padstavie infarmacyi, jakuju nam paviedamili supracoŭniki kłuba, mahu zrabić vysnovu, što hetych ludziej nie puścili nie z-za taho, što adzin ź ich byŭ u invalidnaj kalascy, a z-za taho, što jany znachodzilisia ŭ stanie ałkaholnaha apjanieńnia.
Surazmoŭca padkreśliŭ, što ŭ zhadanaj ustanovie niama miesca dyskryminacyi pa jakoj-niebudź prykmiecie, a ŭ kłubie rady ŭsim haściam — u tym liku i ludziam z abmiežavanymi mahčymaściami.
— Mianie ździŭlajuć apublikavanyja skrynšoty pierapiski, jakaja nibyta mieła miesca ŭ Fejsbuku z pradstaŭnikom našaha kłuba. Usie kamunikacyi my viadziem vyklučna na našym aficyjnym kanale ŭ Viber, — dadaŭ jon.
Na dumku pradstaŭnika Rich Cat, u hetaj historyi spracavaŭ efiekt «sarafannaje radyjo», a infarmacyja, jakaja raspaŭsiudžvajecca ŭ sacyjalnych sietkach, nie adpaviadaje rečaisnaści.
