Ź Biełarusi departavany hramadzianin Rasiei Alaksiej Palichovič, jaki byŭ zatrymany ŭ Miensku 25 sakavika. Nibyta za ŭdzieł u niesankcyjanavanaj akcyi maładomu čałavieku prysudzili 12 sutak administracyjnaha aryštu.
Sud Kastryčnickaha rajonu Miensku vyznačyŭ, što Palichovič «nios bieł-čyrvona-bieły ściah i vykrykvaŭ lozunhi na biełaruskaj movie». Pry tym, što sam rasiejec sprabavaŭ davieści, što biełaruskaj movy nia viedaje.
Siońnia Alaksiej Palichovič viarnuŭsia ŭ Maskvu i na svajoj staroncy ŭ Fejsbuku paviedamiŭ: jamu zabaronieny ŭjezd u Biełaruś na praciahu 10 hadoŭ — da 7 krasavika 2027 hodu.
Alaksiej Palichovič źjaŭlajecca fihurantam spravy ab biesparadkach na Bałotnaj płoščy ŭ Maskvie ŭ traŭni 2012 hodu. Razam ź inšymi aktyvistami jon pryznany vinavatym va ŭdziele ŭ «masavych biesparadkach i ŭžyvańni hvałtu ŭ dačynieńni da pradstaŭnikoŭ ułady». Aktyvistu prysudzili 3,5 hady kalonii ahulnaha režymu.
Pavodle ambasady Rasiei ŭ Biełarusi, 25 sakavika ŭ Miensku byli zatrymanyja čaćviora rasiejskich hramadzianaŭ, troje ź ich pakaranyja administracyjnymi aryštami.
