Dziejučy čempijon Biełarusi pa futbole, barysaŭski BATE ŭ druhim tury pieršynstva krainy minimalna abyhraŭ «Minsk» i vyjšaŭ na druhoje miesca ŭ turnirnaj tablicy.
Matč prajšoŭ 9 krasavika na «Barysaŭ-Arenie». Pieramohu dla svajoj kamandy vyrvaŭ u sapiernikaŭ padpisany sioleta sierbski lehijanier Anies Ruševič — jon adkryŭ lik u hulni na 87-j chvilinie. Hety adzin hoł i staŭ pieramožnym dla barysaŭčan — 1:0. Ciapier kłub zaniaŭ druhoje miesca ŭ turnirnaj tablicy.
Minskaje «Dynama» taksama minimalna pieramahło «Naftan» — 1:0. Hoł na rachunku Uładzimira Chvaščynskaha. Staličny kłub zamacavaŭsia na pieršym miescy.
Vyniki inšych matčaŭ 2-ha tura, jakija prajšli 8-9 krasavika: «Krumkačy» — «Dynama» (Brest) — 1:1, «Šachcior» — «Homiel» — 0:0, «Viciebsk» — «Dniapro» — 0:4, «Słavija» — «Haradzieja» — 1:0, «Isłač» — «Nioman» — 0:1.
10 krasavika tur zaviaršycca matčam «Słuck» — «Tarpieda-BiełAZ».
