Stužka Instagram pa cheštehu #bonsticks
Uvohule, sa zdymkaŭ u Instagram možna było b skłaści top-20 miescaŭ, kudy možna prylapić bonścikaŭ: na łob, na nos, na akulary, na kielich, na paznohci, na hadzińnik, na šapačku dla płavańnia… — karaciej, varyjantaŭ proćma.
Chtości navat pasprabavaŭ «padsadzić» na bonścikaŭ ryb.
U niadzielu, 9 krasavika, kampanija abviaściła zaviaršeńnie akcyi.
Vidavočna, zabava pryjšłasia daspadoby nie tolki dzieciam, choć handlovaja sietka najpierš mieciła ŭ hetuju aŭdytoryju: jak nie dapamahčy sabrać dziciaci kalekcyju, kali dla jaho heta tak važna? U sacyjalnych sietkach navat pačali stvarać supołki pa abmienie bonścikami, a niekatoryja pasprabavali na hetym jašče i zarabić, arhanizavaŭšy pieraprodaž.
«Jeŭraopt» zładziŭ ceły tur pa Biełarusi dla čatyroch plušavych bonścik-piersanažaŭ. Jany abjechali bolš za 20 haradoŭ i sustrelisia z 70 tysiačami biełarusaŭ — heta jak piać razoŭ sabrać «Minsk-Arenu».
U Oršy, darečy, pieršaje znajomstva z bonścikami, na jakoje pryjšło niekalki tysiač haradžan, spyniła milicyja — «niesankcyjanavanaja akcyja».
Tur bonścikaŭ pa Biełarusi.
Karaciej, pijar-kampanija atrymałasia zaŭvažnaj. U supołkach bonścikaŭ u sacsietkach ahułam bolš za 30 tysiač padpisantaŭ — i heta ŭsiaho za niekalki miesiacaŭ. Darečy, pieršapačatkova płanavałasia, što akcyja praciahniecca miesiac. Adnak pakolki biełarusaŭ, jakija masava pačali kalekcyjanavać pačvarak, było ŭžo nie spynić, nie strymać — kampanija vyrašyła padoŭžyć kalektyŭnaje «varjactva».
Armija bonścikaŭ.
Lik bonścikaŭ idzie na miljony
Jak raspaviała kiraŭnica pijar-adździeła «Jeŭraopta» Taćciana Kurbat, vobrazy i imiony bonścikaŭ prydumała tvorčaja hrupa kampanii. Taćciana zapeŭnivaje, što hetych fihurak niama bolš nidzie ŭ śviecie, choć sama ideja i nie novaja.
«My praanalizavali reakcyju ludziej na padobnyja prajekty ŭ inšych krainach i zrazumieli, što chočam zrabić jašče bolš maštabna i bolš zaŭvažna. Na naš pohlad, u nas heta atrymałasia. Toje, što «zalipła» ŭsia kraina, jak my kažam unutry kampanii, heta vidavočna, — adznačaje Taćciana.
— Asnoŭnaja aktyŭnaść była zbudavanaja na ažyŭlenych piersanažach i bonścik-mabili, na jakim jany pierasoŭvalisia. Hetaja vielizarnaja zialonaja mašyna vyklikała zachapleńnie i «vaŭ». My zrazumieli, što ideja ažyvić niekalki hierojaŭ akazałasia słušnaj, tamu što dzieciam, jak pakazała praktyka, krychu nie chapaje śviata. My hetaje śviata pastaralisia dla ich zrabić. Vielmi ščyra, bieź niejkaha tam namieru. I vielmi rady, što ŭ nas heta atrymałasia. My prydumali dla dziaciej kazku, u jakuju jany pavieryli».
Kolki dakładna bonścikaŭ za čas akcyi było vypuščana — kamiercyjnaja tajamnica, adnak Taćciana kaža, što lik idzie na miljony.
Bonściki ŭ Homieli. Fota gp.by.
«Vyhladaje, što isnuje damoŭlenaść pamiž «Jeŭraoptam» i ŭładami»
U akcyi kampanii niama ničoha zvyšhienijalnaha i novaha, ale heta pracuje. Padajecca, cudoŭny prykład inšym hulcam na biełaruskim rynku: biary i rabi. Adnak viadomy rekłamist, kiraŭnik prajekta Belretail.by Siarhiej Skarachod tak nie ličyć.
«Jeŭraopt» — heta asobny vielmi vialiki hulec našaha rynku, jakomu dziaržava nadała asablivuju rolu sacyjalnaha rytejlera. Vyhladaje, što isnuje damoŭlenaść pamiž kampanijaj i ŭładami, — miarkuje Siarhiej.
— Kampanija robić šmat dla taho, kab cyvilizavany handal dajšoŭ paŭsiul, u tym liku i da našych maleńkich viosak. Isnuje pohlad, što jana zachapiła ŭvieś rynak i nie puskaje nikoha da kankurencyi, ale heta pytańnie adnosinaŭ «Jeŭraopta» ź dziaržavaj».
Rekłamist nie dumaje, što na akcyi z bonścikami kampanija zarabiła niejkija šalonyja hrošy. Jon miarkuje, što pry ich abjomach heta tolki adzin nievialiki instrumient upłyvu praź dziaciej na metavuju aŭdytoryju, praca na łajalnaść. Siarhiej Skarachod nie bačyć ničoha zahannaha ŭ tym, što biełarusy zvarjacieli na hetych fihurkach. Na jaho dumku, kali tak zdaryłasia, značyć, ludziam nie chapała emocyj, niejkich maleńkich radaściaŭ u žyćci. Kali biznes daŭ im heta — dobra.
Na sustrečy z bonścikami ŭ Baranavičach. Fota intex-press.by.
«Mnie padajecca, što jakaść hetych fihurak nižej za jeŭrapiejskuju płanku, treba było zrabić lepšyja. Adnak z punktu hledžańnia markietynhu — usio dobra, jany małajcy, — kaža Siarhiej. — «Jeŭraopt» vyhladaje inavacyjna, idzie pa takich samych efiektyŭnych šlachach markietynhu, jakija ŭžo adpracavali na rynku Zachodniaj Jeŭropy».
