Ministr zamiežnych spraŭ Vialikabrytanii Barys Džonsan budzie patrabavać ad kiraŭnikoŭ zamiežnapalityčnych viedamstvaŭ krain, jakija ŭvachodziać u G7, uviadzieńnia novych abmiežavalnych mier u dačynieńni da Rasii, piša The Times.
Pa infarmacyi vydańnia, pryčynaj namiery Džonsana źjaŭlajecca palityka Maskvy ŭ adnosinach da Siryi. Kiraŭnik brytanskaha MZS ličyć, što Rasija padtrymlivaje režym prezidenta Bašara Asada, jakoha zachodnija krainy, u tym liku i ZŠA abvinavačvajuć va ŭžyvańni chimičnaj zbroi suprać mirnaha nasielnictva.
Svaje prapanovy pa sankcyjach, udakładniaje vydańnie, Džonsan pradstavić na sustrečy kiraŭnikoŭ MZS krain G7 u Italii, jakaja zapłanavana na paniadziełak. U zajavie, jakuju budzie prasoŭvać Džonsan, «vialikaja siamiorka» abaviaža Rasiju spynić supracoŭnictva ź Siryjaj, u tym liku i vajskovaje. U vypadku admovy zachodnija krainy ŭviaduć novyja sankcyi. Hazieta padkreślivaje, što metaj budzie «zrabić žyćcio vielmi ciažkim» dla ŭradavych čynoŭnikaŭ, piša rbc.ru.
Napiaredadni, 9 krasavika, pastajanny pradstaŭnik ZŠA pry AAN Niki Chejli u intervju CNN zajaviła, što administracyja Donalda Trampa ŭ ciapierašni čas prapracoŭvaje pytańnie ab raspracoŭcy i ŭviadzieńni novych sankcyj suprać Rasii z-za padtrymki režymu Asada. Abmiežavańni chočuć ŭvieści taksama i suprać Irana.
10 krasavika Barys Džonsan pavinien byŭ naviedać Maskvu z aficyjnym vizitam, adnak paśla prymianieńnia chimičnaj zbroi ŭ siryjskaj pravincyi Idlib jon admoviŭsia.
