Vyniki biełaruskich parłamienckich vybaraŭ 2016-ha hoda roźniacca ad vybaraŭ 2008 i 2012 hadoŭ nie tolki tym, što ŭ parłamient prajšła pradstaŭnica apazicyjnaj partyi Hanna Kanapackaja.
Jość pryncypovaja i vielmi važnaja charaktarystyka, jakaja dadatkova, chaj i ŭskosna, stavić pad sumnieŭ usie aficyjnyja vyniki. Sprava ŭ tym, što na vybarach 2008 i 2012 hoda ŭsie kandydaty-pieramožcy adrazu nabirali bolš za 50% hałasoŭ, a na apošnich vybarach karcina rezka źmianiłasia.
Vidavočna, što razhadka hetaha — novyja vybarčyja praviły, jakija dazvalajuć uładnaj viertykali trochi rassłabicca z prypiskami.
Sprava ŭ tym, što raniej dziejničaŭ pryncyp absalutnaj bolšaści hałasoŭ: kandydat pieramahaŭ pa svajoj akruzie ŭ pieršym ža tury, kali nabiraŭ bolš za pałovu hałasoŭ, heta značyć, bolš za 50%.
U inšym vypadku patrabavaŭsia druhi tur z udziełam dvuch kandydataŭ, jakija nabrali bolšuju kolkaść hałasoŭ.
Kab nie było praciahu vybarčaj kanicieli, kožnamu kandydatu-pieramožcu na ŭsich 110 akruhach treba było abaviazkova adrazu ž nabirać bolš za pałovu hałasoŭ. Što cudoŭnym čynam i adbyvałasia i ŭ 2008, i ŭ 2012.
Zhodna z novymi praviłami na vybarach-2016, u parłamient aŭtamatyčna prachodziŭ kandydat, jaki nabiraŭ prostuju bolšaść hałasoŭ, biez usialakich druhich turaŭ. Heta značyć, atrymać pieramohu ciapier možna choć i z 20%. Pry ŭmovie, što kožny ź inšych kandydataŭ pa akruzie nabiraje jašče mienšuju kolkaść hałasoŭ.
Kali ŭziać parłamienckija vybary 2008 hoda, dyk tady va ŭsich biez vyklučeńnia 110 akruhach krainy pieramožcy ŭ pieršym ža tury nabrali bolš za 50% hałasoŭ. Pryčym vyniki pa niekatorych akruhach vyhladajuć aniekdatyčna.
Naprykład, u Homielska-Savieckaj akruzie za Łarysu Kuźniacovu nibyta prahałasavali 19803 vybarščyki, ci krychu bolš za 50%. Kali b za jaje prahałasavała ŭsiaho na 57 čałaviek mienš, to ŭžo spatrebiŭsia druhi tur.
Ale druhi tur pa nivodnaj z 110 akruhaŭ pravodzić nie było patreby.
Na parłamienckich vybarach 2012 hoda tyja kandydaty, što pieramahli, nabrali bolš za 50% u pieršym ža tury ŭ 109 akruhach, a jašče ŭ adnoj — Homielska-Navabielickaj akruzie — vybary nie adbylisia.
Tak adbyłosia tamu, što Ihar Prakapienka, były pamočnik Łukašenki, niečakana źniaŭ svaju kandydaturu pierad samymi vybarami — pahavorvajuć, z-za našumiełaj spravy ab machinacyjach z kvaterami. U akruzie zastaŭsia tolki adzin kandydat ad Libieralna-demakratyčnaj partyi Siarhiej Mielnikaŭ, jakoha ŭłady ŭ parłamient puskać, vidavočna, nie chacieli.
U vyniku bolš za 80% vybarcaŭ z Homiela, abo roŭna 34200 čałaviek, — takich elektaralnych precedentaŭ u historyi Biełarusi nie było — prahałasavali na svajoj akruzie «suprać usich», a niepažadanamu kandydatu dastałasia ŭsiaho 13,2%.
Na praviedzienych paźniej paŭtornych vybarach u parłamient prajšoŭ patrebny centralnaj uładzie kandydat, nabraŭšy bolš za pałovu hałasoŭ u pieršym ža tury.
Nam prapanujuć pavieryć, što mistyčnym čynam usie kandydaty, što pieramahli na vybarach 2008 i 2012 hadoŭ, stabilna adrazu atrymlivali bolš za pałovu hałasoŭ vybarcaŭ na svaich akruhach.
Tak było roŭna da vybaraŭ 2016-ha hodu, jakija adbylisia pa novych vybarčych praviłach. Raptam u krainie źjavilisia akruhi, dzie kandydaty-pieramožcy atrymali mienš za pałovu hałasoŭ.
I pa Minsku takich akruhaŭ cełych vosiem z dvaccaci. Było b naiŭna ličyć, što taki raskład z vynikami troch apošnich parłamienckich vybaraŭ — usiaho tolki najvialikšaja vypadkovaść.
Charakterna, što na adnoj ź minskich akruhaŭ — Kastryčnickaj — pieramožca nabraŭ usiaho 23,7%. Havorka idzie ab Hańnie Kanapackaj, adzinaj pradstaŭnicy apazicyjnaj partyi, jakaja patrapiła ŭ parłamient. Na hetaj ža akruzie Hanna Kanapackaja nibyta abyšła eks-kandydatku na prezidenckich vybarach Taćcianu Karatkievič. Jak bačycie, u biełaruskich arhanizataraŭ vybaraŭ vielmi niezvyčajnaje pačućcio humaru!
