Aŭstralijski repier Tery Piek pa mianušcy 2pec, jaki paabiedaŭ na bujnuju sumu ŭ rybnym restaranie, pasprabavaŭ uciačy ad piersanału ŭpłaŭ, kab nie płacić pa rachunku, piša VVS.
33-hadovy mužčyna paŭstaŭ pierad sudom u paniadziełak paśla incydentu ŭ restaranie Omeros Bros na kurorcie Siorferz Paradajz. Paviedamlajecca, što jon źjeŭ tam dvuch amaraŭ, vaśminoha, a taksama vypiŭ 21 vustryčnay šot z harełkaj i niekalki butelek piva.
«O, Boža! Jon adzin?» — spytała sudździa Džoan Uajt padčas razhladu spravy mužčyny, jakomu vystaŭlenyja abvinavačvańni ŭ kradziažy i napadzie.
Rachunak za abied u restaranie pieravyšaŭ 450 dalaraŭ, ale zamiest taho, kab zapłacić, Piek skoknuŭ u mora i pasprabavaŭ spłyści.
Palicyja na vodnych matacykłach adpraviłasia ŭ pahoniu za repieram, jaki paźniej abviaściŭ, što płyŭ na dapamohu siabroŭcy, jakaja ŭ hety samy čas naradžała dzicia na plažy, paviedamlajuć miascovyja ŚMI.
Tery Piek taksama zajaviŭ, što padadzienyja jamu amary byli pieravaranyja. Pradstaŭnik restarana Mark Chaniban adchiliŭ krytyku ŭ adras jakaści pryhatavańnia praduktaŭ, zajaviŭšy: «My hanarymsia tym, jak vydatna hatujem našych amaraŭ».
Aŭstralija — daloka nie adzinaja kraina, dzie restarany sutykajucca z prablemaj uciokaŭ klijentaŭ.
U minułym miesiacy ispanskaja palicyja aryštavała mierkavanaha vierchavoda bandy, jakaja ździejśniła sieryju hastranamičnych nabiehaŭ na restarany, ni razu nie zapłaciŭšy pa rachunku.
U sakaviku hrupa, kudy ŭvachodzili bolš za 100 čałaviek, zamoviła straŭ i napojaŭ na dźvie tysiačy jeŭra ŭ restaranie hatela «Karmen» na paŭnočnym zachadzie Ispanii. Złamyśniki śćviardžali, što ładziać śviatočny abied z nahody chreśbinaŭ, ale potym pasprabavali źbiehčy, nie zapłaciŭšy.
Anałahičny incydent praz tydzień adbyŭsia ŭ restaranie El Rincon de Pepin niepadalok paśla «śviatkavańnia viasiella».
