Staršynia Kanfierencyi Katalickich Biskupaŭ u Biełarusi arcybiskup Tadevuš Kandrusievič 2 maja vystupiŭ u Akademii kiravańnia pry Prezidencie Respubliki Biełaruś z dakładam, pryśviečanym adnosinam pamiž relihijnymi arhanizacyjami i dziaržavaj.

U svaim dakładzie ijerarch padkreśliŭ, što ŭ Biełarusi saśpieła reforma dziaržaŭna-relihijnych adnosin.

Pra pryncyp aŭtanomii relihii i palityki

«U asnovie adnosin Kaścioła i dziaržavy znachodziacca słovy Chrysta: «Bohu — Bohava, a Cezaru — cezarava». Adsiul i hałoŭny pryncyp vučeńnia Kaścioła ab aŭtanomii relihii i palityki, Kaścioła i dziaržavy, — skazaŭ ijerarch. — Takaja norma ŭ bolšaści krain śvietu ŭsprymajecca jak ahulnapryniataja».

Tym nie mienš, jak adznačyŭ arcybiskup, aŭtanomnaść nie aznačaje ŭzajemnaj izalacyi Kaścioła ad dziaržavy, bo jany «choć i roznymi sposabami, adnak słužać tym samym ludziam».

«Kaścioł nie patrabuje dla siabie nijakich pryvilejaŭ, a tolki pryznańnia pravoŭ, patrebnych dla jaho dziejnaści», — padkreśliŭ arcybiskup Tadevuš Kandrusievič.

Padpisańnie kankardatu daść mahčymaść vykonvać misiju Kaścioła

Ijerarch dadaŭ, što siońnia adnosiny pamiž Katalickim Kaściołam i dziaržavami rehulujucca praz zaklučeńnie śpiecyjalnych pahadnieńniaŭ — kankardataŭ. Takija pahadnieńni, pavodle Mitrapalita, na mižnarodnym uzroŭni vyznačajuć pravy i abaviazki bakoŭ — Apostalskaha Pasadu i kankretnaj dziaržavy.

Arcybiskup zaznačyŭ, što razmovy pra padpisańnie kankardatu ŭžo šmat hadoŭ viaducca i ŭ Biełarusi:

«U hetym zacikaŭleny abodva baki, — padkreśliŭ ijerarch. — Adnak, jašče daloka nie ŭsie prablemy, źviazanyja z padrychtoŭkaj takoha pahadnieńnia, vyrašany, choć my spadziajomsia na prahres u hetaj važnaj spravie».

Pavodle ijerarcha, padpisańnie takoha dakumienta ŭ Biełarusi «daść novyja mahčymaści ŭ vykanańni misii Kaścioła ŭ krainie ŭ adpaviednaści z kananičnym pravam i tradycyjaj Kaścioła», a sam dakumient budzie spryjać «pavyšeńniu imidža Biełarusi na mižnarodnaj arenie».

U svaim dakładzie Mitrapalit Kandrusievič zakranuŭ i pytańni abnaŭleńnia zakanadaŭstva ŭ relihijnaj śfiery, jakija siońnia rehulujucca artykułami Kanstytucyi i Zakonam «Ab svabodzie sumleńnia i relihijnych arhanizacyjach».

«Hety zakon ahulny dla ŭsich relihij i kanfiesij, — skazaŭ ijerarch. — Ale varta padkreślić, što dla poŭnaha prava na svabodu vieravyznańnia nieabchodny dziaržaŭna-kanfiesijnyja pahadnieńni, jakija ŭličvali b asablivaści roznych kanfiesij i relihij», — padkreśliŭ Mitrapalit.

«Voś tamu Apostalski Pasad i imkniecca da padpisańnia takoha pahadnieńnia. Bieź jaho Kaścioł nie moža ŭ poŭnaj miery ažyćciaŭlać svaju dziejnaść u Respublicy Biełaruś, jak heta adbyvajecca ŭ inšych krainach», — skazaŭ arcybiskup.

Taksama ŭ dakładzie katalicki ijerarch zakranuŭ temu nieabchodnaści ŭ Biełarusi zakona ab restytucyi, spraščeńnia paradku atrymańnia dapamohi niekamiercyjnymi arhanizacyjami, spraščeńnia dazvołu na słužeńnie ŭ krainie zamiežnych śviataroŭ, unarmavańnie relihijnaha vychavańnia ŭ škołach i šerah inšych momantaŭ.

U mierapryjemstvie ŭ miežach prahramy pavyšeńnia kvalifikacyi pryniali ŭdzieł kiraŭniki hałoŭnych upraŭleńniaŭ, adździełaŭ ideałahičnaj pracy, kultury i pa spravach moładzi abłvykankamaŭ, harvykankamaŭ, rajvykankamaŭ

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?