«Kopf an Kopf». Tak kamientavała SüddeutscheZeitung situacyju niapredadni ziamielnych vybaraŭ u Šleźvih-Halštejnie.

I voś ciapier, kali vybarčyja ŭčastki začynilisia, vyśviatlajecca, što «Kopf an Kopf» było piać hadoŭ tamu, kali sacyjał-demakraty na vybarach u łandtah nabrali 30,4 pracenta hałasoŭ, a chryścijanskija demakraty — 30,8. Sioleta ž chadeki istotna adarvalisia ad svaich sajuźnikaŭ-kankurentaŭ. Kolkaść hałasoŭ, padadzienych za Chryścijanska-demakratyčny sajuz, pavialičyłasia nie našmat — na 1,2 adsotka — i dasiahnuła pakazčyka 32. A voś sacyjał-demakraty stracili 3,2 pracenta hałasoŭ i, atrymaŭšy padtrymku 27,2 adsotka vybarščykaŭ, adstali ad chadekaŭ na 4,8 pracenta. U pieraliku na mandaty heta aznačaje, što CHDS budzie mieć u ziamielnym parłamiencie 25 miescaŭ (na 3 miescy bolš, čym u 2012-m), a Sacyjał-demakratyčnaja partyja Hiermanii — 21 miesca (na adno mienš).

Razryŭ, zdavałasia b, nieistotny, ale tut važna, ź jakim vynikam da finišu vybarčaha marafonu pryjšli sajuźniki sacyjał-demakrataŭ — zialonyja i SSW (Sajuz vybarščykaŭ Paŭdniovaha Šleźviha, jaki abjadnoŭvaje miascovych datčan, nadzielenych — jak etničnaja mienšaść — peŭnymi pryvilejami). Zialonyja stracili zusim mała (0,3 pracenta hałasoŭ). Atrymaŭšy padtrymku 12,9 adsotka vybarščykaŭ, jany buduć mieć u łandtahu 10 miescaŭ. Datčanie taksama stracili niašmat — 1,3 pracenta hałasoŭ — i z 3,3 adsotka padtrymki buduć mieć 3 deputackija kresły.

Zialonyja i SSW nie stracili nivodnaha mandata. I tolki strata sacyjał-demakratami 3,2 adsotka hałasoŭ pryviała da taho, što raniejšaja ŭradavaja kaalicyja na čale z esdekami ŭ Šleźvih-Holštajnie niemahčymaja, bo ŭ sumie SDPH, zialonyja i SSWatrymali tolki 34 mandaty, a ŭsiaho ŭ łandtahu 73 miescy.

Kamu pajšli hałasy SDPH, zialonych i SSW? Samo saboj, chadekam. Umacavała pazicyi i Svabodnaja demakratyčnaja partyja, jakaja ŭžo daŭnavata pierastała być uradavaj u Hiermanii. Padtrymka libierałaŭ pabolšała na 3,3 pracenta. Atrymaŭšy 11,5 pracenta hałasoŭ vybarščykaŭ, jany buduć mieć u łandatahu 9 kresłaŭ.

I narešcie ŭžo ŭ dvanaccatym ziamielnym parłamiencie buduć zasiadać pradstaŭniki pravapapulisckaj Alternatyvy dla Hiermanii. U Šleźvih-Holštajnie hetuju partyju padtrymali 5,9 pracenta vybarščykaŭ, i jana budzie mieć 5 mandataŭ. Sacyjałohija jašče pakaža, chto padtrymaŭ ultrapravych, ale ŭžo ciapier jasna, što ŭ Šleźvih-Holštajnie stracili nie chadeki i nie libierały. Straty panieśli sacyjał-demakraty i ich sajuźniki pa ŭradavaj kaalicyi.

Nie dapamahło sacyjał-demakratam i zialonym i toje, što Partyja pirataŭ, jakaja na papiarednich vybarach atrymała padtrymku 8,2 adsotka vybarščykaŭ i 6 mandataŭ, apynułasia sioleta za ścienami łandtaha.

I jašče dźvie sumnyja naviny dla sacyjał-demakrataŭ.

Pieršaja. «Šulc-efiekt», na jaki tak spadziavalisia esdeki, znoŭ nie spracavaŭ. U sakaviku, nahadaju, papularnaść novaha lidara SDPH nie pryniesła nijakaj karyści sacyjał-demakratam Saara. Ci budzie ź jaje jakaja karyść na vybarach u łandtah Paŭnočnaha Rejna — Viestfalii, jakija adbuducca 14 traŭnia, pabačym.

Druhaja. Asablivaściu sioletnich vybaraŭ u Šleźvih-Halštejnie było toje, što ŭpieršyniu na vybarčyja učastki pryjšli 16-hadovyja hramadzianie. Praŭdapadobna, u bolšaści hetyja junyja niemki i niemcy hałasavali nie za sacyjał-demakrataŭ i nie za zialonych.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?