9 maja ŭ Kijevie adbudziecca pieršy paŭfinał mižnarodnaha konkursu pieśni «Jeŭrabačańnie». Tranślacyja — na telekanale «Biełaruś 1», pačatak — u 23.00.

Raspaviadajem u niekalkich słovach pra vystupoŭcaŭ i dadajom ich pieśni. Pišycie ŭ kamientarach vaš top-3 najlepšych vystupoŭcaŭ pieršaha paŭfinału.

Šviecyja. Robin Bengtsson — I Can't Go On

Papularnaść napatkała śpievaka paśla ŭdziełu ŭ konkursie «Idol 2008», dzie jon zaniaŭ treciaje miesca. U dyskahrafii Robina 13 sinhłaŭ i nivodnaha alboma. Ale heta nie pieraškodziła jamu pieramahčy ŭ adbory na Jeŭrabačańnie z zapalnaj pieśniaj «I Can't Go On». 27-hadovy švied źjaŭlajecca adnym ź sioletnich favarytaŭ.

Hruzija. Tamara Gachechiladze — Keep The Faith

Tamara «Tako» źbirałasia pradstaŭlać svaju krainu jašče ŭ 2009 hodzie, ale była dyskvalifikavanaja za palityčny źmiest pieśni. Razam z kvartetam jany chacieli vykanać pieśniu «We Don't Wanna Put In». Sioleta hruzinka budzie vystupać solna ź pieśniaj «Keep The Faith» (Zachavaj vieru)».

Aŭstralija. Isaiah — Don't Come Easy

Aŭstralija dakazała, što moža ździŭlać na Jeŭrabačańni. U hetym hodzie krainu budzie pradstaŭlać 17 hadovy śpiavak. Ajzaja u 2016 hodzie ŭdzielničaŭ u miascovym konkursie X-faktar, uvieś svoj čas pryśviačaje muzycy. Pavodle jaho słoŭ, najbolšy ŭpłyŭ na jaho zrabiła Marajia Kery, ź jakoj śpiavak choča kali-niebudź praśpiavać duetam. Jaho pop-bałłada «Don't Come Easy» raspaviadaje pra maru i zmahańnie za jaje.

Ałbanija. Lindita — World

Lindyta prakłała svaju ściežku da papularnaści praź pieramohi ŭ konkursie «Top Fest» i ŭdzieł u šou «Amierykanski idał». Lindyta naradziłasia ŭ horadzie Vici na poŭdni aŭtanomnaj respubliki Kosava ŭ Juhasłavii. U 2014 hodzie dziaŭčyna zaniała treciaje miesca na konkursie «Festivali i Këngës», a letaś tam ža pieramahła, što dała joj prava pradstaŭlać krainu na konkursie.

Bielhija. Blanche — City Lights

Jašče adna favarytka sioletnaha konkursu. Elli Dełvoks, jakaja vystupaje pad psieŭdanimam Blanche naradziłasia ŭ Bruseli. Vy nie pavierycie, ale joj usiaho 17 hod. Śpiavačka ŭdzielničała ŭ roznych konkursach, ale nie sa svaimi pieśniami. Jaje «City Lights» («Ahni horadu») — pieršaja ŭłasnaja pieśnia. Pryčym, miarkujučy pa staŭkach bukmiekieraŭ, vyjšła davoli dobra:

Čarnahoryja. Slavko Kalezić — Space

A voś mahčymy kankurent Kančyty Vurst. Słaŭka maje doŭhuju kasu, jakaja vielmi pryciahvaje ŭvahu. Sam śpiavak ź dziacinstva byŭ źviazany z tvorčaściu — vučyŭsia ŭ akademii mastactvaŭ, hraŭ u Nacyjanalnym teatry, zdymaŭsia ŭ kino. U 2011 hodzie raspačaŭ muzyčnuju karjeru i maje ŭžo adzin albom. Jahony vystup na Jeŭrabačańni moža być dastatkova ŭražlivym.

Finlandyja. Norma John — Blackbird

Finski duet Lejeny i Łasse. Pamiž saboj jany znajomyja vielmi daŭno i zajmajucca muzykaj bolš za 15 hod. Pieśnia ich sapraŭdy pa-skandynaŭsku suvoraja i adnačasova pryhožaja. Svajoj muzykaj hurt sprabuje abjadnać ludziej i kultury. Pahladzicie ci ŭdajecca im heta.

Azierbajdžan. Dihaj — Skeletons

Dyjana Hadžyjeva, vakalistka «Dihaj», maje ŭkrainskija karani. Naradziłasia ŭ 1989 hodzie ŭ Maryupali. Ź dziacinstva zajmałasia muzykaj, skončyła muzyčnuju akademiju, zajmałasia džazam na prafiesijnym uzroŭni. Jašče ŭ 2010 hodzie Dyjana sprabavała pieramahčy ŭ nacyjalnym adbory, ale nie zmahła prajści ŭ finał. U 2014 byŭ stvorany hurt «Dihaj», ź jakim śpiavačka źbirajecca pieramahčy na Jeŭrabačańni-2017. Bubnačom u hurcie, darečy, źjaŭlajecca muž Dyjany.

Partuhalija. Salvador Sobral — Amar Pelos Dois

Dumali, što tolki Naviband buduć śpiavać na rodnaj movie? Nie-a! Partuhalec Salvador Sabrał adziny ŭ pieršym paŭfinale, chto budzie śpiavać nie pa-anhlijsku. I ŭ jaho davoli niebłahija šancy, bo jon i italjaniec siońnia na pieršych miescach u bukmiekieraŭ. Niehledziačy na svaju ścipłaść, Salvador u dziacinstvie abjeździŭ uvieś śviet, udzielničaŭ u šmatlikich konkursach i maje svoj solny albom. Mahčyma jon skaryŭ usich svajoj prastatoj?

Hrecyja. Demy — This is Love

Afinskaja pryhažunia Dzimitra Papadeja taksama maje dastatkova vialikija šancy na vychad u finał. Dziaŭčynu zaŭsiody ciahnuła ŭ muzyku, niehledziačy navat na toje, što jana maje vyšejšuju jurydyčnuju adukacyju. Prajekt «Demy» Dzimitra zasnavała jašče ŭ 2011 hodzie. Z taho času śpiavačka maje 2 albomy, 15 sinhłaŭ, uznaharody ad MTV, hreckich telekanałaŭ, časopisaŭ i h.d.

Polšča. Kasia Moś — Flashlight

Kasia Moś naradziłasia ŭ siamji viadomaha polskaha dyryžora Marka Mosia. Ź dziacinstva jana išła pa baćkavym šlachu — skončyła muzyčnuju škołu, a paśla fakultet džaza i zabaŭlalnaj muzyki pa kłasu vakała. U 2002 hodzie jana zapisała svaju pieršuju pieśniu, u 2011 užo hrała ŭ kłubach Łas-Viehasa, a ŭ 2015 vypuściła solny albom. Paśla pieramohi ŭ nacyjanalnym adbory Kasia nie hublała čas i prajechałasia turam pa Jeŭropie, tamu ŭ jaje taksama vielmi dobryja šancy na vychad u finał.

Małdova. Sunstroke Project — Hey Mamma

Nu kudy ž biez vykanaŭcaŭ, ad jakich tak i pre pazityvam. Hurt «Sunstroke Project» užo pradstaŭlali Małdovu na konkursie ŭ 2010 hodzie, ale tady zaniali 22-je miesca. Ale tady jany tak jaskarava vystupili, što ich saksafanist staŭ miemam. U 2012 hurt taksama sprabavaŭ prabicca na Jeŭrabačańnie, ale z-za abvinavačvańnia ŭ płahijacie nie prajšli navat u pieršy etap nacyjanalnaha adboru. Sioleta hurt taksama vystupaje z davoli jarkaj pieśniaj, ale bukmiekiery nie nadta vysoka aceńvajuć ich šancy.

Isłandyja. Svala — Paper

Jašče adna śpiavačka ź siamji muzykaŭ. Baćki Svały — viadomyja śpievaki ŭ Isłandyi. U 7 hod dziaŭčyna była na bek-vakale ŭ svajho backi. U svajoj krainie Svała jašče ŭ dziacinstvie prasłaviłasia, dziakujučy vykanańniu kaladnych piesień. Śpiavačcy ŭžo 40 hod i joj sapraŭdy jość što pakazać — maje svaju liniju vopratki, dva albomy, a jaje pieśni nabirajucca sotni tysiač prasłuchoŭvańniaŭ. Pahladzim jak heta acenić aŭdytoryja Jeŭrabačańnia.

Čechija. Martina Bárta — My Turn

Marcina Barta viadoma ŭ Čechii ŭ pieršuju čarhu jak adkryćcio džazavaj sceny. U svajoj bijahrafi jana adznačaje ŭmieńnie hrać na vałtornie i udzieł u miuzikle «Robin Hud». Razam ź siastroj u 2016 hodzie jana atrymała ŭznaharodu za najlepšaje vykanańnie džazavaj pieśni ŭ Čechii. Pra svaju pieśniu ŭ intervju miascovaj haziety jana skazała tak: «Ja by nie zmahła vyjści da vialikaj aŭdytoryi ź pieśniaj, jakaja b całkam mianie nie identyfikavała. Ja vieru što «My Turn» i jość taja samaja pieśnia».

Kipr. Hovig — Gravity

Kiprski śpiavak armianskaha pachodžańnia Ovih Demirčan nie z samaha pačatku vyrašyŭ, čym jon choča zajmacca. Skončyŭšy ŭniviersitet, jon pracavaŭ markietołaham u ofisie, ale ŭ peŭny momant zrazumieŭ, što choča inšaha. Tak Ovih i raspačaŭ karjeru śpievaka. Jon navučyŭsia hrać na hitary i fartepijana, a taksama vyvučaŭ džaz i vakał. Ovih staŭ viadomy, dziakujučy ŭdziełu ŭ šou X-faktar u 2009 hodzie, dzie jon finišavaŭ na siomym miescy. Pakul 28-hadovy Ovih maje tolki 4 albomy, ale kali jamu padvierniecca ŭdača, to jaho muzyčnaja karjera budzie iści dalej uvierch.

Armienija. Artsvik — Fly With Me

Śpiavačka Arćvik budzie viadomaja amataram rasijskaha šou «Hołas», bo jana ŭdzielničała tam u 2-m siezonie. U 5 hod razam z baćkami jana pierajechała ŭ Maskvu, tam advučyłasia ŭ škole z matematyčnym uchiłam, paśla skončyła ŭniviersitet pa śpiecyjalnaści psichołah-łahapied. Ale muzyka pieramahła. U 2012 hodzie Arćvik udzielničaje adrazu ŭ dvuch konkursach i heta prynosić joj peŭnuju papularnaść. Dziakujučy vystupam u jaje atrymałasia pradstavić Armieniju na Jeŭrabačańni ŭ Kijevie. U svaich pieśniach Arćvik vykarystoŭvaje narodny matyvy, časam pieraśpiavaje narodnyja pieśni.

Słavienija. Omar Naber — On My Way

Šyrokuju viadomaść Amar atrymaŭ, pieramohšy ŭ 2004 hodzie ŭ šou maładych talentaŭ. Tady ž śpiavak prezientavaŭ svaju pieršuju pieśniu. U 2005 hodzie Amar užo pradstaŭlaŭ Słavieniju na konkursie, ale trapić u finał nie ŭdałosia. U dyskahrafii śpievaka 2 albomy, 9 sinhłaŭ, jość niekalki videaklipaŭ. Na radzimie Amar maje šmat uznaharod. Sioleta śpiavak abraŭ vakalna mocnuju pieśniu dla Jeŭrabačańnia.

Łatvija. Triana Park — Line

A zakryvać pieršy paŭfinał Jeŭrabačańnia budzie łatvijski hurt, jaki tolki z šostaha razu zmoh pieramahčy ŭ finale nacyjanalnaha adboru. Ich upartaść apraŭdałasia hałasami hledačoŭ, jakija vyznačyli ich pieramohu. «Triana Park» vystupajuć na bujnych jeŭrapiejskich fiestyvalach, ich albom byŭ naminavany na Łatvijskuju muzyčnuju premiju. Svaju pieśniu hurt tłumačyć takim čynam: «Linija» — futurystyčnaje bačańnie, u jakim Ziamla hinie. Uciekačy, terarystyčnyja akty, zabojstvy ŭ imia palityki i vysokich metaŭ. Taki śviet, jaki nikoli nie pieražyŭ pieramohu razumnaha čałavieka nad złom i nie viedaŭ momant, kali treba pravieści rysu i spynicca.

Tranślacyja pieršaha paŭfinała pačniecca ŭ 23:00.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?