Karparacyja Google apłaciła administracyjny štraf u pamiery 438 młn rasijskich rubloŭ (6,75 młn dalaraŭ na momant zaklučeńnia miravoha pahadnieńnia), pryznačany za parušeńnie antymanapolnaha zakanadaŭstva, paviedamiła Fiederalnaja antymanapolnaja słužba Rasii, piša VVS.
Kanflikt doŭžyŭsia bolš dvuch hadoŭ: u lutym 2015 hoda rasijskaja kampanija «Jandeks» padała skarhu na Google, abvinavaciŭšy jaje ŭ złoŭžyvańni daminujučym stanoviščam na rynku pieradustalavanych dadatkaŭ u apieracyjnaj sistemie Android.
Vosieńniu 2015 hoda FAS pryznała patrabavańni «Jandeksa» spraviadlivymi i zahadała Google likvidavać parušeńni. Google biespaśpiachova sprabavała asprečyć rašeńnie FAS u arbitražnym sudzie Maskvy.
U sakaviku 2016 hoda kiraŭnik FAS Rasii Ihar Arciemjeŭ zajaviŭ, što kampanija Google viadzie siabie ahresiŭna i nie sprabuje šukać kampramis u sprečcy z uładami. Vosieńniu taho ž hoda jon paabiacaŭ štrafavać Google kožnyja dva tydni, kali kampanija budzie zaciahvać vykanańnie pradpisańnia viedamstva.
U krasaviku 2017 hoda FAS i Google zaklučyli miravoje pahadnieńnie, pastaviŭšy tym samym kropku ŭ sudovych razhladach. Internet-hihant abaviazaŭsia vypłacić štraf u 438 młn rasijskich rubloŭ, pryznačany raniej.
Akramia taho, zhodna z umovami miravoha pahadnieńnia, Google admovicca ad ekskluziŭnaj pieradustaloŭki svaich dadatkaŭ na mabilnych pryładach Android i nie budzie abmiažoŭvać pieradustaloŭku dadatkaŭ trecich bakoŭ.
Vytvorcy smartfonaŭ zmohuć zaklučać na kamiercyjnych umovach pahadnieńni z Google i ŭstaloŭvać lubyja dadatki, u tym liku na hałoŭny ekran, i amierykanski internet-hihant nie budzie im u hetym pieraškadžać.
Pahadnieńnie raspaŭsiudžvajecca na pryłady, pryznačanyja dla prodažu ŭ Rasii. Jano budzie dziejničać šeść hadoŭ i dzieviać miesiacaŭ.