Hramadskaje abjadnańnie «Biełaruskaja asacyjacyja žurnalistaŭ» źviarnułasia ŭ Śledčy kamitet, Hienieralnuju prakuraturu i KDB z patrabavańniem arhanizavać pres-kanfierencyju dla pradstaŭnikoŭ usiaho śpiektru srodkaŭ masavaj infarmacyi i padać aficyjnuju infarmacyju ab chodzie rasśledavańnia kryminalnych spraŭ, jakija atrymali šyroki hramadski rezanans (tak zvanyja «sprava «Biełaha lehijonu» i «sprava patryjotaŭ»).
U zvarocie da kiraŭnikoŭ siłavych struktur I. Naskieviča, V. Vakulčyka i A. Kaniuka staršynia BAŽ Andrej Bastuniec piša:
«Hetym rezanansnym spravam byli pryśviečanyja materyjały niekatorych dziaržaŭnych ŚMI (telekanały «Biełaruś 1», STV, ONT, hazieta «SB Biełaruś siehodnia» i inš.), zasnavanyja, jak śćviardžałasia ŭ ich, na infarmacyi śledstva. Pry hetym, jak praviła, nie nazyvalisia ni aŭtary hetych materyjałaŭ, ni słužbovyja asoby, jakija padali źviestki pa kryminalnych spravach, a sami materyjały vyhladali čaściakom subjektyŭnymi i adnabakovymi.
Miž tym, pradastaŭleńnie źviestak pa rezanansnych kryminalnych spravach pavinna być nakiravana na atrymańnie hramadzianami ad dziaržaŭnych orhanaŭ poŭnaj, dakładnaj i svoječasovaj infarmacyi, a nie jaje subjektyŭnaj interpretacyi ananimnymi aŭtarami (p. 1 Pałažeńnia ab paradku pradastaŭleńnia źviestak pa kryminalnych spravach, źviazanych z złačynstvami, jakija atrymali šyroki hramadski rezanans, i złačynstvami, jakija padryvajuć aŭtarytet dziaržaŭnaj ułady, dla aśviatleńnia ŭ srodkach masavaj infarmacyi, zaćvierdžanaha pastanovaj Hienieralnaj prakuratury Respubliki Biełaruś, Kamiteta dziaržaŭnaha kantrolu Respubliki Biełaruś, Ministerstva ŭnutranych spraŭ Respubliki Biełaruś, Kamiteta dziaržaŭnaj biaśpieki Respubliki Biełaruś i Ministerstva justycyi Respubliki Biełaruś 01.10.2008 № 59/4/283/49/52).
Źviestki vydajucca ŭ tym abjomie, u jakim nie zakranajuć pravoŭ i zakonnych intaresaŭ udzielnikaŭ kryminalnaha pracesu, trecich asob, jakija nie parušajuć tajamnicy śledstva, pravoŭ i intaresaŭ inšych asob, dziaržavy (p. 27 Pałažeńnia). Niedapuščalnaje pradastaŭleńnie na stadyi dasudovaj vytvorčaści ŭ ŚMI materyjałaŭ kryminalnaj spravy, jakija majuć dokaznaje značeńnie i jakija padlahajuć acency ŭ sudzie (p. 29 Pałažeńnia).
Na naš pohlad, infarmacyja, jakaja raspaŭsiudžvajecca šeraham dziaržaŭnych ŚMI pa ŭkazanych vyšej rezanansnych spravach sa spasyłkami na krynicy ŭ orhanach śledstva nie adpaviadaje hetym patrabavańniam Pałažeńnia i parušaje roŭnaść srodkaŭ masavaj infarmacyi, a taksama prava hramadzian na atrymańnie dakładnaj i svoječasovaj infarmacyi ab dziejnasci dziaržaŭnych orhanaŭ.
Padobnym ža čynam pradastaŭlajecca ŭ ŚMI i infarmacyja pa spravie Ju. Paŭłaŭca, D. Alimkina i S. Šypcienki, jakija ŭžo bolš za čatyry miesiacy ŭtrymlivajucca pad vartaj pa abvinavačańni ŭ raspalvańni nacyjanalnaj varožaści ŭ materyjałach, raźmieščanych na sajtach rasijskaha infarmacyjnaha ahienctva «Rehnum» i šerahu inšych rasijskich ŚMI.
Hetaja kryminalnaja sprava taksama vyklikaje hramadski rezanans pry minimalnaj aficyjnaj infarmacyi ab chodzie jaje rasśledavańnia».
U suviazi z vykładzienym BAŽ prosić:
1) U chutkim časie arhanizavać pres-kanfierencyju (bryfinh, sustreču z žurnalistami) z udziełam pradstaŭnikoŭ usiaho śpiektru srodkaŭ masavaj infarmacyi Respubliki Biełaruś, na jakoj pradstavić aficyjnuju infarmacyju ab chodzie rasśledavańnia hetych kryminalnych spraŭ.
2) U budučyni pry rasśledavańni rezanansnych spraŭ zabiaśpiečvać roŭny dostup da značnaj infarmacyi srodkam masavaj infarmacyi ŭsich form ułasnaści, zabiaśpiečvajučy tym samym pryncyp roŭnaści ŚMI i prazrystaść dziejnaści dziaržaŭnych orhanaŭ.
