U Minsku kiroŭca za adzin dzień dvojčy papaŭsia pjanym u pole zroku dziaržaŭtainśpiektaraŭ, paviedamlaje Tut.by. Pieršy raz, kali ździejśniŭ DTZ u dvary doma — sutyknuŭsia z pryparkavanaj mašynaj — i jaho aŭtamabil źmiaścili na štrafnuju stajanku. Druhi raz kiroŭca pryjšoŭ na štrafstajanku i pasprabavaŭ zabrać svaju ž mašynu. Jon znoŭ byŭ mocna pjany.

Paviedamleńnie ab DTZ u dvary doma na vulicy Skrypnikava pastupiła ŭ DAI Frunzienskaha rajona kala 11.00. Vidavočcy paviedamili, što kiroŭca na Volkswagen Passat sutyknuŭsia z Honda, jakaja stajała pobač. Minaki zatrymali kiroŭcu — toj byŭ niećviarozy — i pieradali jaho ekipažu DAI Frunzienskaha rajona, jaki prybyŭ na miesca. Volkswagen u pjanaha kiroŭcy kanfiskavali i dastavili na štrafstajanku. U kryvi ŭ jaho vyjavili 2,52 pramile ałkaholu.

Praz try hadziny achoŭnik štrafstajanki patelefanavaŭ u DAI i paviedamiŭ, što ŭładalnik adnoj z mašyn pryjšoŭ na štrafstajanku, sieŭ u mašynu i pasprabavaŭ źjechać.

«Achoŭnik zatrymaŭ mužčynu, a ekipaž, jaki prybyŭ na miesca, vyśvietliŭ, što heta toj samy kiroŭca, jakoha ŭžo zatrymlivali ranicaj — jon uziaŭ doma zapasnyja klučy i vyrašyŭ zabrać aŭtamabil sa štrafstajanki. U kryvi ŭ jaho vyjavili 2,36 pramile ałkaholu. Na miescy kiroŭca rastłumačyŭ, što pasvaryŭsia z žonkaj i vyrašyŭ vypić», — paviedamiła staršy inśpiektar DAI Frunzienskaha rajona Alena Vołčak.

Za heta pravaparušeńnie kiroŭcu pahražaje štraf u pamiery ad 50 da 100 bazavych vieličyń, zhodna z st. 18.16 KoAP (Kiravańnie transpartnym srodkam u niećviarozym stanie). Da taho ž kiroŭcu pahražaje štraf za DTZ. Pa hetym fakcie pravodzicca raźbiralnictva.

Nahadajem, kiroŭcu, jaki trapiŭsia za rulom niećviarozym dvojčy na praciahu hoda, pahražaje kryminalnaja adkaznaść až da pazbaŭleńnia voli i kanfiskacyi aŭtamabila.

Клас
0
Панылы сорам
0
Ха-ха
0
Ого
0
Сумна
0
Абуральна
0