Pieršyja čatyry vałanciory — dvoje mužčyn i dźvie žančyny — ustupili ŭ piekinski «Juehun-1» («Chram Miesiaca-1») — simulatar žyćcia ŭ blizkich da miesiacovych umovach, paviedamlajuć infarmahienctvy.
Vałanciory praviaduć tut 60 dzion. Pa skančeńni hetaha terminu ich źmienić druhaja hrupa vałancioraŭ, jakaja taksama składajecca z 2 mužčyn i 2 žančyn. Im treba budzie pravieści ŭ «Juehun-1» 200 dzion. Zatym pieršaja hrupa vałancioraŭ vierniecca ŭ simulatar jašče na 105 dzion.
Ekśpierymient pad kodavaj nazvaj «Juehun-365» dazvolić kitajskim navukoŭcam zrazumieć, što patrabujecca dla padtrymańnia žyćcia čałavieka na pavierchni Miesiaca ŭ siarednie- i doŭhaterminovaj pierśpiektyvie.
Taksama budzie pravieranaja pracazdolnaść bijarehienieratyŭnaj sistemy žyćciezabieśpiačeńnia, jakaja ŭžo prachodziła paśpiachovyja 105-dzionnyja vyprabavańni ŭ 2014 hodzie. Hetaja sistema dazvalaje žyviołam, raślinam i mikraarhanizmam suisnavać. Vada i pradukty prachodziać pierapracoŭku, u vyniku ŭ simulatary ŭźnikajuć ŭmovy, blizkija da ziamnych.
«Juehun-1» uklučaje vialikuju ahulnuju kabinu płoščaj 42 kv. m, u jakuju ŭvachodziać spalnyja miescy, pakoj adpačynku, sanvuzieł, abstalavańnie pierapracoŭki adchodaŭ i pamiaškańnie pa vyroščvańni žyvioł, i dźvie kabiny-parniki prykładna pa 50-60 kv. m.
