Mitrapalit Minski i Zasłaŭski Pavieł, Patryjaršy Ekzarch usiaje Biełarusi, źviarnuŭsia da prezidenta Ukrainy Piatra Parašenki z nahody zakonaprajektaŭ na relihijnuju temu, jakija 18 maja pavinna razhledzieć Viarchoŭnaja rada. Ab hetym paviedamlaje Tut.by sa spasyłkaj na pres-słužbu Biełaruskaj pravasłaŭnaj carkvy.
«Ad imia Sinoda Biełaruskaha Ekzarchata, duchavienstva i šmatlikaj pastvy Biełaruskaj Pravasłaŭnaj Carkvy, žycharoŭ Biełarusi źviartajusia da vas, jak haranta vykanańnia Kanstytucyi Ukrainy, pravoŭ i svabod čałavieka i hramadzianina daručanaj vašamu kiraŭnictvu krainy, z prośbaj stać na abaronu pravoŭ i svabody vieravyznańnia bratniaha nam ukrainskaha naroda», — havorycca ŭ pačatku lista ŭkrainskamu prezidentu.
Mitrapalit Pavieł zakłapočany tym, što 18 maja Viarchoŭnaja rada razhledzić «antypravasłaŭnyja zakonaprajekty».
Havorka idzie ab zakonaprajekcie № 4128 «Ab uniasieńni źmianieńniaŭ u zakon Ukrainy «Ab svabodzie sumleńnia i relihijnych arhanizacyjach», a taksama zakonaprajekcie № 4511 «Ab asablivym statusie relihijnych arhanizacyj, kirujučyja centry jakich znachodziacca ŭ dziaržavie, jakaja pryznanaja Viarchoŭnaj radaj krainaj-ahresaram».
Pieršy dakumient praduhledžvaje, što pryznačać mitrapalitaŭ i biskupaŭ takija relihijnyja arhanizacyi zmohuć tolki pa ŭzhadnieńni z orhanami ŭłady.
Jašče adzin artykuł hetaha zakona abviaščaje, što «kali pradstaŭniki kanfiesii buduć supracoŭničać z relihijnymi centrami ŭ dziaržavie-ahresary», ułada nadzialajecca pravam naohuł jaje zabaranić na terytoryi Ukrainy. Nahadajem, častka dyjacezij Ukrainskaj Pravasłaŭnaj Carkvy znachodziacca na terytoryi «DNR» i «ŁNR», što ŭžo stvaraje farmalnuju nahodu dla zabarony UPC.
U druhim zakonaprajekcie ŭdakładnienaja minimalnaja kolkaść pradstaŭnikoŭ relihijnaj supolnaści, zhodna z rašeńniem jakich moža być źmienienaja padparadkavanaść chramaŭ kanfiesijam.
«Zhadanyja zakonaprajekty ŭ vypadku ich pryniaćcia pasłužać padstavaj dla biesprecedentnaha ŭ žyćci sučasnaj cyvilizavanaaj čałaviečaj supolnaści pryhniotu kanstytucyjnych pravoŭ i svabod miljonaŭ hramadzian Ukrainy, aburalnaj dyskryminacyi pieravažnaj bolšaści nasielnictva krainy pa prykmiecie jaho prynaležnaści da Ukrainskaj Pravasłaŭnaj Carkvy», — ličyć kiraŭnik BPC.
«Biełaruskaja Pravasłaŭnaja Carkva, vystupajučy ŭ abaronu miru, spraviadlivaści i zdarovaha sensu, u abaronu svaich ukrainskich bratoŭ pa viery, asudžaje inicyjatyvu ab pryniaćci Viarchoŭnaj radaj Ukrainy zakonaprajektaŭ № 4128 i № 4511. Kali zhadanyja zakonaprajekty buduć pryniatyja, heta moža ŭvieści Ukrainu ŭ chaos biasprykładnaj hramadzianskaj vajny na hlebie relihijnych hanieńniaŭ i represij u dačynieńni da ŭkrainskaha pravasłaŭja», — padkreśliŭ mitrapalit Pavieł.
