Z 19 traŭnia Raśsielhasnahlad uvodzić časovyja abmiežavańni na pastaŭki ŭ Rasieju pradukcyi vysokaj ryzyki (suchoje małako, syr, masła), vyrablenaj biełaruskimi pradpryjemstvami.
Pad zabaronu trapili Kobrynski masła-syrarobny zavod, Maładziečanski małočny kambinat, małočnaja kampanija «Navahradzkija dary», Pružanski małočny kambinat, Słucki syrarobny kambinat i jaho lubanski filijał.
Jak paviedamlaje Raśsielhasnahlad, pryčynaj zabarony stali nieadnarazovyja parušeńni hetymi pradpryjemstvami veterynarna-sanitarnych patrabavańniaŭ EAES, parušeńni pakazčykaŭ biaśpieki, paŭtornyja vyjaŭleńni reštkaŭ antybijotykaŭ u małočnaj pradukcyi.
Da taho ž rasiejskaje viedamstva ŭviało z 19 traŭnia časovyja abmiežavańni na pastaŭki suchoj małočnaj syrovatki, vyrablenaj na pradpryjemstvie «Babuškina krynka». U joj taksama vyjavili reštki antybijotykaŭ.
Raśsielhasnahlad paviedamiŭ biełaruskamu boku pra vypadki pastupleńnia na terytoryju Rasiei pradukcyi z parušeńniem jakasnaha składu ad Baranavickaha małočnaha kambinatu, pradpryjemstva «Vierchnij łuh», Biarezinskaha filijału «Zdravuška-miłk» i Ašmianskaha syrarobnaha zavodu (filijał AAT «Lidzki małočna-kanservavy kambinat»). A ŭ pradukcyi «Małočnaha polusa» paŭtorna znojdzienyja reštki antybijotyku afłaksacinu i kanservanta Je235.
Taksama Raśsielhasnahlad zapatrabavaŭ ad biełaruskaha boku ŭvieści ŭzmocnieny labaratorny kantrol pradukcyi filijału «Skidzielskaja ptuškafabryka» AAT «Ahrakambinat Skidzielski».
Rasiejski bok pryhraziŭ uvieści abmiežavańni na pradukcyju i hetych pradpryjemstvaŭ, kali biełaruski bok nia zrobić naležnych zachadaŭ.