Kiraŭnictva Fiederacyi prafsajuzaŭ Biełarusi i Ministerstva antymanapolnaha rehulavańnia i handlu vypracavała ahulnuju pazicyju pa pytańni ab tym, jak kantralavać ceny na sacyjalna značnyja hrupy tavaraŭ. Pra heta paviedamlaje Tut.by sa spasyłkaj na sajt Fiederacyi prafsajuzaŭ.
Staršynia FPB Michaił Orda padkreśliŭ, što dla prafsajuzaŭ rost cen na asnoŭnyja tavary i pasłuhi asabliva aktualny.
«My abjadnoŭvajem kala 96% pracoŭnych krainy, i dla kožnaha člena prafsajuza heta vielmi važna. Ludzi zadajuć pytańni: čamu zarpłata staić, dalar staić, a ceny rastuć?»
U Fiederacyi prafsajuzaŭ užo stvoranaja rabočaja hrupa pa manitorynhu cen na sacyjalna značnyja tavary i pasłuhi. U jaje skład uvajšli pradstaŭniki sacyjalna-ekanamičnaha błoka ŭsich abłasnych i Minskaha haradskoha abjadnańniaŭ prafsajuzaŭ.
Členy rabočaj hrupy štomiesiac abaviazanyja rabić zrez koštaŭ praduktaŭ charčavańnia ŭ kramach — bujnych sietkavych i krokavaj dastupnaści. Manitorynh achopić abjekty nie tolki ŭ stalicy i abłasnych haradach, ale i ŭ niekatorych rajonnych centrach. Usia infarmacyja budzie ściakacca ŭ FPB, dzie śpiecyjalisty praviaduć jaje detalovy analiz.
Naprykład, siaredniuju canu na tuju ci inšuju hrupu tavaraŭ, jakija karelujucca sa «spažyvieckim košykam», paraŭnajuć ź siaredniaj zarabotnaj płataj rabotnikaŭ pa krainie. Takim čynam atrymajecca acanić, ci moža siaredniestatystyčny hramadzianin dazvolić sabie bazavy nabor praduktaŭ i jakuju dolu ŭ jaho dachodach składaje suma, vydatkavanaja na ich nabyćcio. Płanujecca taksama paraŭnoŭvać minimalny pamier cen na tavary «spažyvieckaha košyka» ź minimalnaj zarabotnaj płataj.
Členskija arhanizacyi FPB dapamohuć zrabić zrez pa halinach. Tak, prafsajuz rabotnikaŭ handlu budzie ažyćciaŭlać manitorynh cen na adzieńnie, bializnu, abutak; prafsajuz rabotnikaŭ achovy zdaroŭja — na leki i srodki hihijeny; prafsajuz rabotnikaŭ transpartu i kamunikacyj — na pasłuhi transpartu; prafsajuz rabotnikaŭ suviazi — na pasłuhi suviazi i h. d.
Akramia taho, prafsajuzy miarkujuć nie vypuskać z-pad uvahi i pytańnie płaciežazdolnaści nasielnictva, jakoje datyčycca apłaty kamunalnych pasłuh. Jak viadoma, Biełaruś pastupova adychodzić ad pierakryžavanaha subsidavańnia i płanujecca, što da kanca 2018 hoda žychary krainy buduć apłačvać kamunalnyja pasłuhi na 100%. Z pradpryjemstvaŭ, adpaviedna, zdymajecca peŭnaja finansavaja nahruzka, značyć, u ich zastajecca bolš hrašovych srodkaŭ, jakija jany, siarod inšaha, mohuć vykarystoŭvać i dla pavieličeńnia zarabotnaj płaty svaim rabotnikam.
Atrymanaj pa vynikach manitorynhu infarmacyjaj Fiederacyja prafsajuzaŭ Biełarusi padzielicca sa svaimi partniorami, u pryvatnaści, z uradam i Ministerstvam antymanapolnaha rehulavańnia i handlu. A najbolš prablemnyja momanty buduć vynosicca na abmierkavańnie ŭ Nacyjanalnym saviecie pa pracoŭnych i sacyjalnych pytańniach.
