Ekśpierty pa kibierbiaśpiecy znajšli techničnyja dokazy taho, što za virusam WannaCry, jaki vymahaŭ hrošy ŭ 300 000 karystalnikaŭ u 150 krainach śvietu, staić Paŭnočnaja Kareja, paviedamlaje The New York Times.

Kampanii Symantec i «Łabaratoryja Kaśpierskaha» znajšli ŭ virusie WannaCry frahmient koda, jakim raniej karystałasia hrupoŭka Lazarus, źviazanaja z uradam Paŭnočnaj Karei. Amierykanskija ŭłady taksama paviedamili pra padabienstvy škodnasnaj prahramy WannaCry z raniejšymi prahramami paŭnočnakarejskich chakieraŭ.

Symantec i «Łabaratoryja Kaśpierskaha» taksama paviedamili, što daśledčyki pavinny jašče bolš padrabiazna praanalizavać kod prahramy, i źviarnulisia pa dapamohu da inšych kampanij. Sprava ŭ tym, što vykarystańnie ŭ virusie WannaCry radkoŭ koda paŭnočnakarejski chakieraŭ moža być vyklikana tym, što stvaralniki WannaCry jaho prosta skapijavali, tamu padabienstva kodaŭ nie moža źjaŭlacca biassprečnym dokazam datyčnaści KNDR. Jeŭrapiejskija i amierykanskija siłaviki pakul nie śpiašajucca z aficyjnymi abvinavačvańniami.

Chakiery Lazarus, jakija pracujuć na KNDR, viadomyja ŭ pieršuju čarhu svaimi kibieratakami nie ź idejnych mierkavańniaŭ, a z-za hrošaj. Jany padazrajucca ŭ kibieratacy na banhładešski bank, u vyniku jakoj źnik 81 młn dalaraŭ.

Viadoma, što za niekalki dzion aktyŭnaści WannaCry złamyśniki zdoleli sabrać z achviar tolki kala 70 tysiač dalaraŭ. Imavierna, u hetym vypadku złamyśniki ažyćciaŭlali ataku nie dziela hrošaj, a dziela maksimalnaha paškodžańnia kampjutaraŭ.

Bolš za ŭsio kampjutaraŭ virus zaraziŭ u Rasii, Ukrainie, Tajvani i Indyi. Pikam virusnaj ataki stała piatnica 12 maja, kali kožnuju hadzinu virus zaražaŭ bolš za 9 000 kampjutaraŭ.

Cikava toje, što chakiery stvaryli škodnasnuju prahramu WannaCry pry dapamozie softu Ahienctva nacyjanalnaj biaśpieki (ZŠA), jaki byŭ raniej skradzieny i trapiŭ u adkryty dostup. Pra heta paviedamiŭ u svaim błohu prezident Microsoft Bred Śmit. 

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?