U trunie prezidenta Polščy Lecha Kačyńskaha, jaki zahinuŭ pry krušeńni Tu-154 pad Smalenskam u 2010 hodzie, vyjaŭlenyja frahmienty cieł dvuch inšych čałaviek, paviedamlajuć polskija ŚMI sa spasyłkaj na zajavu namieśnika hienieralnaha prakurora krainy Mareka Pasienieka.
Raniej paviedamlałasia, što ŭ niekatorych mahiłach achviar smalenskaj avijakatastrofy znajšli frahmienty cieł inšych ludziej. Namieśnik prakurora paćvierdziŭ heta, udakładniŭšy, što frahmienty inšych cieł byli znojdzienyja ŭ dzieviaci pachavańniach, piša VVS.
Ekshumacyja cieł achviar katastrofy pravodzicca ŭ ramkach novaha rasśledavańnia pryčyny krušeńnia prezidenckaha Tu-154. U siaredzinie listapada pieršymi byli ekshumavanyja pareštki Lecha Kačyńskaha i jaho žonki.
Prakurory tłumačyli, što ekshumacyja pravodzicca z metaj vypraŭleńnia pamyłak i chibaŭ, dapuščanych pry pieršapačatkovaj ekśpiertyzie cieł, jakaja pravodziłasia rasijskimi kryminalistam.
Usiaho ŭłady płanujuć ekshumavać pareštki 83 achviar krušeńnia na praciahu hoda. Na dadzieny momant praviedziena 27 ekshumacyj, jašče šeść adbuducca ŭ červieni, a ŭ samyja haračyja miesiacy, u lipieni i žniŭni, ekshumacyja pravodzicca nie budzie, dadaŭ jon.
Polskaja prakuratura praviaraje, ci jość vina rasijskich miedykaŭ u tym, što pareštki apynulisia ŭ roznych mahiłach.
«Viadziecca asobny razhlad ab adkaznaści rasijskich miedykaŭ. My nakiravali ŭ Rasiju zapyt ab pravavoj dapamozie», — skazaŭ Pasieniek.
Śledstva pakul nie maje danych aŭtapsii, jakija płanujecca apublikavać u červieni, udakładniŭ Pasieniek. Kančatkovyja vyniki ŭskryćcia achviar, imavierna, buduć apublikavanyja viasnoj nastupnaha hoda.
Pa słovach Pasienieka, ekśpierty pavinny adkazać na pytańnie ab pryčynach i abstavinach śmierci pasažyraŭ Tu-154.
Daśledavańnie i analiz pareštkaŭ pravodzicca ŭ zamiežnych łabaratoryjach, u pryvatnaści, u brytanskaj, u hrafstvie Kient.
