Reuters.com
Prezident ZŠA Donald Tramp abviaściŭ, što Złučanyja Štaty vychodziać z Paryžskaha pahadnieńnia ab klimacie, zaklučanym u 2015 hodzie. U chodzie svajoj pieradvybarnaj kampanii ŭ minułym hodzie Tramp paabiacaŭ vybarščykam pryniać hetaje rašeńnie.
Pry hetym Tramp zajaviŭ, što Vašynhton pačnie novyja pieramovy ab zaklučeńni pahadnieńnia pa klimacie na ŭmovach, bolš spraviadlivych i vyhadnych dla Złučanych Štataŭ.
Tramp zajaviŭ, što Amieryka zmoža damahčysia lepšych umoŭ, i heta dapamoža amierykanskaj pramysłovaści.
«Heta pahadnieńnie - nie stolki pra klimat, kolki pra toje, što inšyja krainy atrymlivajuć pieravahu za košt Złučanych Štataŭ», - zajaviŭ Donald Tramp, padkreśliŭšy, što Paryžskaje pahadnieńnie nakładvaje na ZŠA «drakonaŭskija abaviazacielstvy».
Prezident pryvioŭ u jakaści prykładu Kitaj i Indyju, jakija, pavodle jaho słoŭ, zmohuć pašyrać svaju vuhalnuju pramysłovaść, u toj čas jak ZŠA buduć pavinny jaje skaračać.
Vykanańnie abaviazacielstvaŭ u adpaviednaści z Paryžskim pahadnieńniem, zajaviŭ Donald Tramp, kaštavała b ZŠA da 2025 hoda 2,7 młn pracoŭnych miescaŭ.
Donald Tramp abrynuŭsia z krytykaj na Zialony klimatyčny fond AAN (GCF), stvorany dla akazańnia dapamohi krainam, jakija raźvivajucca, u źmiakčeńni nastupstvaŭ źmieny klimatu i adaptacyi da ich.
Pa słovach Trampa, hety fond budzie kaštavać Złučanych Štataŭ miljardy dołaraŭ zvyš toj dapamohi biednym krainam, jakuju ZŠA ŭžo akazvajuć.
***
Paryžskaje pahadnieńnie praduhledžvaje abaviazacielstvy skaracić vykidy vuhlakisłaha hazu ŭ atmaśfieru. Dakumient taksama praduhledžvaje vydzialeńnie da 2020 hoda krainam, jakija raźvivajucca, 100 miljardaŭ dalaraŭ na rašeńnie prablem ekałohii.
Pahadnieńnie pa baraćbie sa źmienami klimatu było padpisana pradstaŭnikami bolš za 170 krain, u tym liku ZŠA, Kitajem i Rasijaj.
U traŭni, napiaredadni samitu «Vialikaj siamiorki», hienieralny sakratar AAN Antoniu Huteryš zaklikaŭ Donalda Trampa nie vychodzić z Paryžskaha pahadnieńnia pa klimacie.
Pa słovach Huteryša, padtrymka Złučanych Štataŭ, najbujniejšaj ekanomiki ŭ śviecie, žyćciova nieabchodnaja dla realizacyi Paryžskaha pahadnieńnia.
Lidary Jeŭrasajuza i Kitaj vyrašyli vypuścić sumiesnuju zajavu, bo, na ich dumku, siońnia heta važna jak nikoli.
