Sumiesnaja zajava biełaruskich pravaabarončych arhanizacyj

Minsk, 7 červienia 2017 h.

5 červienia 2017 hoda pradstaŭnikami biełaruskich pravaabarončych arhanizacyj byli atrymany śviedčańni ab užyvańni ŭ SIZA KDB katavańniaŭ u adnosinach da abvinavačanaha pa č.3 art. 293 Kryminalnaha kodeksa RB Kunceviča Siarhieja Uładzimiraviča. S. Kuncevič źjaŭlajecca adnym ź fihurantaŭ spravy «ab padrychtoŭcy masavych biesparadkaŭ», jakaja maje značny hramadska-palityčny rezanans.

Pakazańni S. Kunceviča byli padrabiazna zafiksavany. Jon źviarnuŭsia ŭ Śledčy kamitet Respubliki Biełaruś z zajavaj ab uzbudžeńni kryminalnaj spravy ŭ suviazi sa ździajśnieńniem u dačynieńni da jaho złačynstva. Jon zajaviŭ, u pryvatnaści, što ŭ chodzie dopytu ŭ budynku KDB Biełarusi, jaki adbyvaŭsia ŭ adsutnaść advakata, asoby ŭ čornaj uniformie i maskach, kali pakoj dla dopytu pakinuli śledčyja, nanieśli jamu niekalki ŭdaraŭ pa ciele, paśla hetaha adzin ź ich 3 - 4 razy vykarystaŭ u dačynieńni da jaho elektrašokier - uździejničaŭ na levuju nahu na praciahu 30 - 40 siekund. Heta prynosiła mocnyja fizičnyja pakuty. S. Kuncevič u pieryjad znachodžańnia ŭ SIZA KDB utrymlivaŭsia ŭ prynižajučych, biesčałaviečnych umovach: 14 dzion spaŭ na padłozie, na praciahu dnia siadzieŭ na vuzkaj došcy, nie atrymlivaŭ miedycynskaj dapamohi. Paśla pieravodu ŭ SIZA №1 jon byŭ padvierhnuty źbićciu supracoŭnikami izalatara.

U suviazi z atrymanaj infarmacyjaj asablivuju zaniepakojenaść vyklikaje zakryty ad biełaruskaj i mižnarodnaj hramadskaści charaktar dadzienaj kryminalnaj spravy (viadomaj taksama jak «Sprava «Biełaha lehijonu» ci «Sprava patryjotaŭ»), adsutnaść jakoj-niebudź aficyjnaj infarmacyi pra jaje rasśledavańnie, sutnaść pradjaŭlenych abvinavačańniaŭ, pra fizičny stan i ŭmovy ŭtrymańnia asobaŭ, jakija znachodziacca pad vartaj. Pad pahrozaj pieraśledu advakatam zabaroniena raskryvać infarmacyju pra stan ich klijentaŭ, pra skarhi na parušeńni ich pravoŭ. U padazravanych i abvinavačanych pa dadzienaj spravie, jakija byli vyzvaleny z-pad varty ŭ suviazi sa źmianieńniem miery strymańnia, niezakonna, u parušeńnie patrabavańniaŭ č. 2 art. 198 KPK Respubliki Biełaruś, orhanami śledstva biarucca padpiski ab nierazhałošvańni dadzienych papiaredniaha rasśledvańnia, pry hetym termin «dadzienyja papiaredniaha rasśledvańnia» traktujecca słužbovymi asobami nadzvyčaj šyroka. Heta surjoznym čynam abmiažoŭvaje ich prava na abaronu.

Pry takich abstavinach vykładzienyja S. Kuncevičam źviestki patrabujuć asabliva ŭvažlivaha staŭleńnia, abjektyŭnaj pravierki i mieraŭ reahavańnia.

Infarmacyja pra ŭžyvańnie katavańniaŭ słužbovymi asobami vyklikaje zaniepakojenaść stanoviščam usich 14-ci fihurantaŭ dadzienaj kryminalnaj spravy, jakija praciahły termin utrymlivajucca ŭ SIZA KDB i SIZA MUS Respubliki Biełaruś.

My, pradstaŭniki pravaabarončaj supolnaści Biełarusi, u čarhovy raz nahadvajem uładam Respubliki Biełaruś:

Svaboda ad katavańniaŭ źjaŭlajecca absalutnym pravam i nie padlahaje nijakim abmiežavańniam navat va ŭmovach vajskovych kanfliktaŭ i nadzvyčajnaha stanovišča. U suviazi z ratyfikacyjaj Respublikaj Biełaruś Mižnarodnaha pakta ab hramadzianskich i palityčnych pravach, a taksama Kanviencyi suprać katavańniaŭ i inšych žorstkich, biesčałaviečnych ci prynižajučych hodnaść vidaŭ abychodžańnia, naša kraina ŭziała na siabie abaviazalnictvy pradprymać efiektyŭnyja zakanadaŭčyja, administracyjnyja, sudovyja i inšyja miery dla papiaredžańnia aktaŭ katavańniaŭ na luboj terytoryi pad jaje jurysdykcyjaj. Taksama Respublika Biełaruś abaviazana zabiaśpiečyć, kab usie akty katavańniaŭ razhladalisia ŭ adpaviednaści z nacyjanalnym kryminalnym zakanadaŭstvam.

Nahadvajem, što ŭ adpaviednaści ź dziejučym zakanadaŭstvam dokazy, atrymanyja z parušeńniem zakona, nie majuć jurydyčnaj siły, nie mohuć być pakładzieny ŭ asnovu abvinavačvańnia i nie mohuć vykarystoŭvacca ŭ jakaści dakazvańnia.

U suviazi z hetym my, pradstaŭniki pravaabarončych arhanizacyj, patrabujem:

  • ad Hienieralnaj prakuratury i Śledčaha kamiteta pravieści abjektyŭnuju pravierku, pryniać zachady pa rasśledavańni ahučanych S. Kuncevičam źviestak pra katavańni i pryciahnuć vinavatych da kryminalnaj adkaznaści;
  • źmianić mieru strymańnia ŭ dačynieńni da ŭsich 14-ci fihurantaŭ kryminalnaj spravy ab padrychtoŭcy masavych biesparadkaŭ i stvareńni niezakonnaha ŭzbrojenaha farmavańnia i nieadkładna vyzvalić ich z-pad varty z metaj praduchileńnia ŭžyvańnia da ich katavańniaŭ;
  • niaŭchilna vykonvać mižnarodnyja abaviazalnictvy pa praduchileńni katavańniaŭ i inšych žorstkich, biesčałaviečnych ci prynižajučych hodnaść vidaŭ abychodžańnia, jakija byli ŭziatyja na siabie Respublikaj Biełaruś.

Pravaabarončy centr «Viasna»
HA «Biełaruskaja asacyjacyja žurnalistaŭ»
PU «Centr pravavoj transfarmacyi»
Biełaruski Dom pravoŭ čałavieka imia Barysa Zvozskava
RPHA «Biełaruski Chielsinkski kamitet»
PU «Biełaruski dakumientacyjny centr»
RHA «Pravavaja inicyjatyva»
Kamitet abarony represavanych «Salidarnaść»
Asambleja niaŭradavych demakratyčnych arhanizacyjaŭ

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?