Trend apošnich dzion — rehistravacca ŭ novaj sacyjalnaj sietcy Nimses, jakaja trymaje top-miescy ŭ AppStore i PlayMarket.
Da hetaha bolš schilnaja moładź — pa tehu #nimses adšukajecie tysiačy dopisaŭ u inšych sacyjalnych sietkach, jakija zaklikajuć stvarać akaŭnty i atrymlivać cuda-nimy ŭ mabilnym dadatku, jakija vy paśla nibyta zmožacie abmianiać na realnyja hrošy ci rečy.
Što heta takoje? «Naša Niva» pasprabavała razabracca ŭ ałharytmach prahramy.
Sami raspracoŭščyki tłumačać sens novaj sietki raspłyvistymi mietafizičnymi farmuloŭkami:
«Nimses dazvalaje stvarać, fiksavać, zachoŭvać i nazapašvać pražyty čałaviekam čas. Jano taksama moža pracavać u jakaści sistemy dla pieradačy času žyćcia ad adnaho čałavieka da inšaha. Nimses dazvalaje ścierci miežy pamiž anłajn i afłajn, pamiž žyćciom i zarobkam na žyćcio, pamiž mieć i być. Heta suśvietnaja sistema ŭsiaho niekali pražytaha času. Ciapier čas možna vydatkoŭvać razumna — na hodnych ludziej, viečaryny, ježu, vopratku — i ŭvohule, što zaŭhodna!», — kažuć aŭtary, ničoha nie prajaśniajučy.
A vyhladaje ŭsio tak — paśla ściahvańnia i rehistracyi ŭ mabilnym dadatku vy atrymlivajecie pa adnym «nimu» — unutranaj valuty — za adnu chvilinu.
Sama sietka nahadvaje simbijoz instahrama z hruvastkim dyzajnam i sietki znajomstvaŭ Tinder. Tolki zamiest łajkaŭ — «nimy». Skažam, kali vy kahości łajkajecie, to da jaho ad vas pierachodzić niejkaja kolkaść «nimaŭ» i naadvarot.
Kurs «nima» da dalara — 1000 za $1.
Taksama vy možacie bačyć usich ludziej pobač z vami, jakija fizična znachodziacca kala vas. Ich fota, adpaviedna, taksama. Tut łohika ŭ blizkaści znachodžańnia, a nie ŭ padpiscy na inšyja akaŭnty. Jakaść kantenta taksama musić być vyrašalnaj — stvaralniki dumajuć, što karystalniku daviadziecca abirać, na što vydatkavać svaje «nimy» i nie łajkać aby-što.
Ale vierniemsia da hrošaj. Ci možna vieryć, što tyja «nimy» vy zdolejecie abmianiać na hrošy?
Vyvučyŭšy prahramu, my schilajemsia da vysnovy, što nie.
Najpierš, tyja «nimy» ničym nie zabiaśpiečanyja, kali tolki nie ŭjavić, što raspracoŭščyki zachočuć dzialicca z karystalnikami svaimi prybytkami ad rekłamy.
Zrešty, kali adkryć akienca vyvadu srodkaŭ, to my ŭbačym vielmi dziŭny kurs da dalara — ažno na 1 lutaha 2018 hoda! Heta zapłanavany čas, kali zapracuje mahčymaść vyvadu hrošaj.
Taksama jość anłajn-krama, jakaja nie pracuje, ale maje prazrysty dyzajn. Jon namiakaje, što za tyja «nimy» možna budzie nabyć navat matacykł — u pieravodzie na dalary za $8000, albo za prykładna 15 hadoŭ karystańnia Nimses, pry ŭmovie adsutnaści choć jakoj aktyŭnaści. Kali vas buduć aktyŭna łajkać, to čas možna źmienšyć.
Słovam, pakul što niama padstavaŭ vieryć, što karystalnik atrymaje niejki prafit ad hetaj sietki.
Zatoje možna dumać, što na «chajpie» aŭtary chočuć zarabić na rekłamie ci pieraprodažy dadatka. Skažam, kali ŭ vas jość niekalki telefonaŭ, to vy za miesiac aktyŭnych łajkaŭ asnoŭnaha akaŭnta zmožacie stać «nim»-miljanieram.
