Daśledčyki z ZŠA raspracavali niejrasietku, jakaja z vysokaj dolaj imaviernaści pa dopisach i łajkach karystalnika moža vyznačyć, źjaŭlajecca jon zaležnym ad ałkaholu i narkotykaŭ ci nie. Daśledavańnie apublikavanaje na sajcie biblijateki Kornelskaha ŭniviersiteta.
Navukoŭcy vykazali zdahadku, što pavodziny čałavieka ŭ sacyjalnych sietkach mohuć ukazvać na ich škodnyja zvyčki. Dla pravierki svajoj hipotezy daśledčyki vykarystali ałharytm mašynnaha navučańnia, jaki byŭ natreniravany z dapamohaj troch baz dadzienych, sabranych z 2007 pa 2012 hod dadatkam dla psichałahičnych testaŭ myPersonality.
Paśla navučańnia niejrasietka zdoleła ŭpeŭniena raspaznavać najaŭnaść škodnych zvyčak u čałavieka. Imaviernaść kureńnia vyznačajecca z maksimalnaj dakładnaściu 86%, imaviernaść užyvańnia ałkaholu i narkotykaŭ — 84% i 81% adpaviedna.
Ałharytm pakazaŭ, što ludzi, jakija kurać i pjuć ałkahol, čaściej užyvajuć słovy, źviazanyja z ruchami («mašyna», «iści»), a taksama lubiać film «V — aznačaje Viendeta». U toj čas jak ludzi, jakija ŭžyvajuć narkotyki, čaściej užyvajuć złyja słovy («zabivać», «nianaviść»), słovy, źviazanyja sa zdaroŭjem («špital», «leki»), a taksama lubiać muzyčnyja hurty Radiohead, The Cure i Depeche Mode.
Raniej sama sacyjalnaja sietka Facebook raspracavała ałharytm, jaki moža vyjaŭlać karystalnikaŭ, jakija znachodziacca ŭ zonie ryzyki i patencyjna mohuć učynić samahubstva.
