Navukoŭcy raspracavali preparat, jaki imituje ŭździejańnie soniečnaha śviatła, dziakujučy čamu zahar źjaŭlajecca na skury biez ŭździejańnia škodnaha ultrafijaletavaha vypramieńvańnia, piša VVS.
Getty
Padčas testaŭ, praviedzienych na ŭzorach čałaviečaj skury i myšach, preparat «padmanuŭ» skuru, prymusiŭšy jaje vypracoŭvać karyčnievy pihmient miełanin — dziakujučy jakomu na skury i źjaŭlajecca zahar.
Miarkujecca, što novy srodak budzie efiektyŭny navat dla ludziej z rudymi vałasami, jakija zvyčajna prosta abharajuć na soncy.
Hrupa daśledčykaŭ z Centralnaha špitala Masačusetsa spadziajecca, što ich adkryćcio zmoža praduchilić rak skury i navat zapavolić nastup bačnych prykmiet stareńnia.
Ultrafijaletavyja pramiani vyklikajuć zahar, pryčyniajučy škodu skury.
Ich uździejańnie inicyjuje łancuh chimičnych reakcyj, što ŭ kančatkovym vyniku pryvodzić da sintezu ciomnaha miełaninu — naturalnaha soncaachoŭnaha srodku, vypracoŭvajemaha arhanizmam.
Novy preparat dazvalaje abyścisia biez uździejańnia ultrafijaletu — paśla kantaktu sa skuraj jon sam zapuskaje miechanizm vytvorčaści miełaninu.
«Jon vyklikaje mocny efiekt paciamnieńnia skury. Z dapamohaj mikraskopa možna pierakanacca, što vypracoŭvajecca sapraŭdny miełanin, heta srodak aktyvuje vytvorčaść pihmientu pry adsutnaści ŭltrafijaletavych pramianioŭ», — raspavioŭ doktar Devid Fišer, adzin z raspracoŭnikaŭ preparata.
Heta pryncypova novy mietad atrymańnia štučnaha zaharu. Da hetaha času heta možna było zrabić tryma asnoŭnymi sposabami:
- šlacham imitacyi zaharu z dapamohaj farbavalnikaŭ, kali skura nabyvaje smuhły koler biez dapamohi achoŭnaha miełaninu;
- naviedvańniem salaryja, dzie skura padviarhajecca mocnamu ultrafijaletavamu apramianieńniu;
- pryjomam śpiecyjalnych tabletak, jakija stymulujuć vytvorčaść miełaninu — ale dla hetaha ŭsie roŭna nieabchodnaje ultrafijaletavaje vypramieńvańnie
Zrešty, aŭtary vynachodki nie stavili sabie zadaču stvaryć novy kaśmietyčny srodak.
«Nasamreč my raspracoŭvajem novuju stratehiju abarony skury ad ultrafijaletavaha vypramieńvańnia i raka», — rastłumačyŭ doktar Fišer.
Tak vyhladaje ŭzor skury (sprava) paśla ŭździejańnia srodku dla zaharu
Rak skury — samy raspaŭsiudžany vyhlad ankałahičnaha zachvorvańnia, u lačeńni jakoha miedycyna prasoŭvajecca marudna.
«Najaŭnaść ciomnaha pihmientu aznačaje nievysokuju ryzyku ŭtvareńnia ŭsich formaŭ raku skury, i heta vielmi važna», — dadaŭ navukoviec.
Vyniki testaŭ, padrabiazna apisanyja ŭ časopisie Cell Reports, pakazali, što miełanin, jaki vypracoŭvajecca dziakujučy preparatu, zdolny błakavać škodnyja ultrafijaletavyja pramiani.
Navukoŭcy chočuć vykarystoŭvać preparat u spałučeńni z kremam dla abarony ad soniečnaj radyjacyi.
Jak ličyć Fišer, absalutna ŭsim nieabchodna vykarystoŭvać soncaachoŭny krem, ale ŭ jaho jość adzin niedachop: «Vy zastanieciesia blednymi», — kaža doktar.
Novy preparat moža vyrašyć prablemu ŭździejańnia soniečnych pramianioŭ na ŭładalnikaŭ rudych vałasoŭ i śvietłaj skury. U hetych ludziej z-za asablivaściaŭ hienomu praces utvareńnia ciomnaha miełaninu pad uździejańniem ultrafijaletavych pramianioŭ praciakaje niezvyčajna, i zamiest zaharu ryžavałosyja časta atrymlivajuć apieki.
Mahčymym pabočnym uździejańniem preparatu, tearetyčna, moža stać źmianieńnie koleru vałasoŭ, choć ličycca, što preparat nie pavinien praniknuć tak hłyboka ŭ skuru, kab zakranuć vałasianyja falikuły.
Inšym pabočnym uździejańniem moža stać zapavoleńnie źjaŭleńnia ŭ čałavieka prykmiet stareńnia. «Mnohija ličać, što samaje vidavočnaje ŭkazańnie na ŭzrost čałavieka — heta stan jaho skury, a navat vypadkovaje ŭździejańnie ŭltrafijaletavych pramianioŭ na praciahu žyćcia nanosić joj škodu», — kaža doktar Fišer.
Jak by toje ni było, preparat jašče nie hatovy dla kamiercyjnaha vykarystańnia. Navukoŭcy chočuć pravieści dadatkovyja daśledavańni na pradmiet biaśpieki praduktu, choć, pa ich słovach, da hetaha času nie było «nijakich namiokaŭ na prablemy».
Imavierna, jany prydumajuć srodku dla zaharu i amaładžeńnia nazvu lepiej, čym ciapierašni «SIK-inhibitar».
