U Śvietłahorsku paśla amal miesiačnaha pierapynku znoŭ pačali rezać koły aŭtamabilaŭ, na jakich prymacavanyja tak zvanyja «hieorhijeŭskija stužki». Čarhovy incydent adbyŭsia ŭ noč z 15 na 16 lipienia ŭ mikrarajonie «Maładziožny».
«Paškodžanymi aŭtamabilami zajmajucca supracoŭniki kryminalnaha vyšuku, — kaža načalnik Śvietłahorskaha adździaleńnia DAI Vasil Haponienka. — «Hieorhijeŭskija stužki» razdavali valantery padčas minułych śviataŭ, niekatoryja aŭtaamatary i pačapili ich na svaje aŭtamabili. My možam tolki rekamendavać kiroŭcam hetaha nie rabić. I rekamendujem».
Miascovyja žychary ŭ Śvietłahorsku ličać, što tut źjaviŭsia nastupnik hieroja savieckaj kamedyi «Ścieražysia aŭtamabila» sa svajoj admietnaj specyjalizacyjaj. Toj Dzietačkin kraŭ aŭtamašyny ŭ ludziej, jakija žyli na «niepracoŭnyja dachody», pradavaŭ, a vyručanyja hrošy pieraličvaŭ na rachunki dziciačych damoŭ.
Ciapierašni «śvietłahorski Dzietačkin», na dumku hramadzkaha aktyvista, historyka Telmana Maślukova, «vajuje» nie z aŭtamašynami, a z «russkim mirom», z separatyzmam dy imperskaściu, symbalem jakich stała rasiejskaja hieorhijeŭskaja stužka padčas vajny na ŭschodzie Ŭkrainy i akupacyi Krymu.
«Niekali hieorhijeŭskaja stužka, praŭda, u krychu inšaj koleravaj hamie, asacyjavałasia z voinskaj advahaju, a ciapier u mnohich vyklikaje admoŭnyja emocyi. Heta jak svastyka: kaliści jana była hrafičnym adlustravańniem sonca, a ŭ rukach fašystaŭ stała symbalem zła i hvałtu», — skazaŭ historyk Maślukoŭ.
U červieni milicyja zafiksavała ŭ Śvietłahorsku kala dziesiaci vypadkaŭ paškodžańnia aŭtamabilaŭ z hieorhijeŭskaj stužkaj. Nieviadomy złamyśnik prakołvaŭ šyny ŭ pakinutych kala damoŭ aŭto. Najbolš takich vypadkaŭ zafiksavana było mienavita ŭ mikrarajonie «Maładziožny». Na adnoj z mašyn nieviadomy navat paskakaŭ, mocna paškodziŭšy kuzaŭ.
Paśla publikacyi ŭ medyja infarmacyi pra vychadki «miascovaha Dzietačkina» mašyny z hieorhijeŭskimi stužkami pakinuli ŭ spakoi. Ale nienadoŭha.
«Majomaść, biezumoŭna, nielha, psavać, — pierakanany śvietłahorski pradprymalnik Jury Lašenka, jaki zajmajecca pasažyrskimi aŭtapieravozkami. — Ale nia treba j pravakavać ludziej na nehatyŭnuju reakcyju, čaplajučy hieorhijeŭskija stužki dy pryklejvajučy partrety Stalina na kapot abo škło. Pałasataja stužka, jakuju pamyłkova nazyvajuć «hieorhijeŭskaj», nieadnaznačna aceńvajecca ŭ našym hramadztvie. U Bieraści i Mahilovie DAI adreahavała štrafami na takija «ŭpryhažeńni» aŭtamabilaŭ. I pravilna. Aŭtamabili z hrafici na kapotach dy bakavinach naahuł nie pavinny na techahladach dapuskacca da ekspluatacyi na biełaruskich darohach».
