Biełaruś zaprosić bolš jak 80 mižnarodnych nahladalnikaŭ na vučeńni «Zachad-2017». Pra heta paviedamiŭ ministr abarony Biełarusi hienierał-lejtenant Andrej Raŭkoŭ, pišm BiełTA.
«Niahledziačy na toje što zajaŭlenaja na vučeńnie «Zachad-2017» kolkaść asabovaha składu, bajavych braniravanych mašyn, artyleryi, avijacyi nie dasiahaje parohavych značeńniaŭ dla paviedamleńnia, my zaprosim našych partnioraŭ, kab jany pierakanalisia, što vučeńnie nie vyrašaje tych zadač, ab jakich jany zajaŭlajuć, — skazaŭ Andrej Raŭkoŭ. — Pry hetym zaprašeńni atrymajuć nie tolki vajennyja ataše, akredytavanyja pry Ministerstvie abarony Respubliki Biełaruś, ale i šerah mižnarodnych arhanizacyj, takich jak AAN, ABSIE, NATA, ADKB, SND, MKČK».
Pavodle słoŭ ministra, buduć vykanany taksama abaviazacielstvy zhodna z rehijanalnymi mierami davieru i biaśpieki. «My čakajem nahladalnikaŭ ad našych susiedziaŭ — Ukrainy, Polščy, Litvy i Łatvii. U ramkach dvuchbakovych damoŭlenaściej zaprošany nahladalniki Estonii, Šviecyi i Narviehii. Usiaho budzie zaprošana bolš jak 80 nahladalnikaŭ», — adznačyŭ Andrej Raŭkoŭ.
Praktyčnyja dziejańni orhanaŭ vajennaha kiravańnia i vojskaŭ projduć u Biełarusi na šaści palihonach — Lepielskim, Barysaŭskim, Łośvida, Asipovickim, palihonach VPS i vojskaŭ PPA Ružanskim i Damanaŭskim, a taksama na adnym učastku miascovaści na terytoryi respubliki pablizu nasielenaha punkta Dretuń. Što datyčycca maštabu vučeńnia, to heta samaje bujnoje mierapryjemstva sumiesnaj apieratyŭnaj padrychtoŭki ŭzbrojenych sił dźviuch krain. Jano źjaŭlajecca łahičnym zaviaršeńniem padrychtoŭki. Napiaredadni vučeńnia praviedziena ŭžo kala 40 sumiesnych mierapryjemstvaŭ apieratyŭnaj i bajavoj padrychtoŭki, u tym liku sumiesnyja śpiecyjalnyja vučeńni pa vidach zabieśpiačeńnia.
