Milicyja złaviła traich mahiloŭcaŭ na padmanie žycharoŭ vobłaści — jany pradavali filtry dla ačystki vady. U dačynieńni da dźviuch žančyn i mužčyny raspačali kryminalnuju spravu za padman spažyŭcoŭ, učynieny hrupaj asob pavodle papiaredniaj zmovy, paviedamili va UUS Mahabłvykankama.

Pravierku pracy pryvatnaha pradpryjemstva pačali ŭ krasaviku 2017 hoda pa daručeńni staršyni Mahiloŭskaha abłvykankama Uładzimira Damanieŭskaha. Na pracu firmy skardzilisia — pisali zvaroty, skazaŭ namieśnik načalnika UBEZ UUS Mahiloŭskaha abłvykankama Alaksandr Słonimski.

Milicyja ŭstanaviła, što z 2016-ha pa sakavik 2017 hoda supracoŭniki pryvatnaj firmy prychodzili dadomu da ludziej - u asnoŭnym, heta byli piensijaniery, - i prapanoŭvali im pastavić filtry dla ačystki vady. Dla pierakanaŭčaści rabotniki pradstaŭlalisia śpiecyjalistami Mahiloŭskaha Harvodakanała abo rajonnaha žyłkamhasa, nie majučy da hetych arhanizacyj nijakaha dačynieńnia.

Padazravanyja kazali, što filtry ŭ lubym vypadku chutka buduć ŭstaloŭvać i zapłacić za ich daviadziecca, ale lepš heta zrabić ciapier, pakul pravodzicca akcyja i dziejničaje źnižka. Davierlivyja piensijaniery raźličvalisia na miescy najaŭnymi pa «akcyjnaj canie» - płacili ad 280 da 350 rubloŭ, choć siaredniaja cana takoha abstalavańnia - kala 100 rubloŭ. Paśla atrymańnia apłaty firmy staviła filtry.

Rabotniki mahiloŭskaj firmy paśpieli pradać filtry žycharam Mahilova i Mahiloŭskaha rajona, a taksama Asipovičaŭ, Kiraŭska i Bychava. Nieadnarazova ašukaŭšy spažyŭcoŭ, jany niezakonna atrymali bolš za 3 tys. rubloŭ.

Pavodle źviestak milicyi, datyčnyja da hetaj supraćpraŭnaj dziejnaści dźvie žančyny 29-ci i 38-mi hadoŭ, a taksama 26-hadovy mužčyna. Im pahražaje da 3 hadoŭ pazbaŭleńnia voli.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?