«2 žniŭnia adznačajecca dziaržaŭnaje śviata — Dzień desantnikaŭ i Sił śpiecyjalnych apieracyj Uzbrojenych sił Respubliki Biełaruś, — nahadvaje «Našaj Nivie» ŭ liście naš čytač Alaksiej. — Ciły śpiecyjalnych apieracyj Uzbrojenych sił Respubliki Biełaruś (SSA US RB) — novy rod vojskaŭ Uzbrojenych siłaŭ našaj krainy. Punktam adliku SSA ličycca stvareńnie 01.08.2007 Kamandavańnia SSA.

SSA US RB sapraŭdy źjaŭlajucca nośbitami tradycyj Pavietrana-desantnych vojskaŭ SSSR. Ale paśla abviaščeńnia niezaležnaści Biełarusi desantnyja padraździaleńni našaj krainy mieli asobnaje raźvićcio, asobnuju historyju, — nahadvaje čytač Alaksiej. — U suviazi ź infarmacyjnaj padačaj adnosna śviatkavańnia dnia Desantnika i SSA prašu:

1) Pravilna užyvać nazvu śviata — Dzień desantnikaŭ i Sił śpiecyjalnych apieracyj Respubliki Biełaruś, ale nie Dzień VDV, kamandujučy SSA, a nie kamandujučy VDV, desantnik, a nie vedevešnik i h.d.

Usie hetyja pamyłki byli ŭ publikacyjach biełaruskich ŚMI i ździŭlajuć svajoj nieprafiesijnaściu.

Pamyłka ŭžyvańnia nazvy VDV u tym, što da sučasnaj Biełarusi jana faktyčna nie maje dačynieńnia. VDV było ŭ SSSR i zastałosia ŭ RF. U Biełarusi VDV spyniła svajo isnavańnie ŭ 1995 h. i byli rearhanizavany ŭ Mabilnyja siły US RB, u 2007 — u SSA. Simvaličnaje pierajmienavańnie ŭ minułym hodzie 38 i 103 asobnych mabilnych bryhad u 38 asobnuju desantna-šturmavuju i 103 asobnuju pavietrana-desantnuju nie daje padstaŭ dla vydumki pavietra-desantnych vojskaŭ Biełarusi.

2) Nie rabić akcent na fantanach (durnoj modzie, jakaja pryjšła sa śviatkavańniaŭ u Maskvie ŭ 1990-ch hadach) i hulańniach pjanych hramadzian. Viadoma, što ŭ Biełarusi užyvajecca šmat ałkaholu, luboje śviata źviazanaje z užyvańniem ałkaholu. Ale žurnalisty iduć da najbližejšaha fantana i budujuć navinu na intervju z pjanym hramadzianinam u cialniašcy. Heta nizki ŭzrovień.

Sprava nie ŭ cenzury. Hetym samym karespandent abražaje prystojnuju bolšaść desantnikaŭ. Navina pra dzień desantnika pavinna vyklikać honar za našy SSA, a nie farmavać ahidu. Našy Uzbrojenyja siły — heta my z vami.

U Biełarusi pravodziacca aficyjnyja śviatkavańni (Minsk, Brest, Viciebsk, Marjina Horka, Baravucha i h.d.). Kali łaska, naviedajcie, zirnicie na honar našaha vojska.

Sa śviatam, biełaruski desant i śpiecnaz!»

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?