Prezident Biełarusi Alaksandr Łukašenka padtrymaŭ prapanovu AAT «Amkador» ab stvareńni ŭ Biełarusi vytvorčaści traktaroŭ z šarnirna-sučlenienaj ramaj. Pra heta paviedamiŭ žurnalistam ministr pramysłovaści Vital Voŭk pa vynikach dakładu ŭrada kiraŭniku dziaržavy ab pierśpiektyvach raźvićcia ajčynnaha traktarabudavańnia, paviedamlaje BiełTA.
«Šarnirna-sučlenieny traktar u Respublicy Biełaruś budzie. «Amkador» i MTZ znojduć uzajemaprymalnaje supracoŭnictva», — adznačyŭ Vital Voŭk. Ministr źviarnuŭ uvahu, što takija traktary karystajucca popytam na zamiežnych rynkach i Biełaruś zmoža skłaści kankurencyju zamiežnym pradpryjemstvam, jakija vypuskajuć takuju techniku.
Pad jakim brendam i na jakim pradpryjemstvie buduć źbiracca traktary z šarnirna-sučlenienaj ramaj, jašče kančatkova nie vyrašana. Mahčyma, biełaruskija vytvorcy prosta abmianiajucca technałohijami i napracoŭkami. Pakul nie vyklučajecca, što «Amkador» i MTZ pojduć na ciesnuju kaapieracyju: heta dazvolić abjadnać namahańni najlepšych śpiecyjalistaŭ u krainie i syści ad zališnich vydatkaŭ, jakich niemahčyma było b pry stvareńni vytvorčaści z nula.
Alaksandr Łukašenka daručyŭ da 1 vieraśnia padrychtavać prapanovy pa farmacie pracy nad hetym prajektam.
Pramysłovaja vytvorčaść šarnirna-sučlenienych traktaroŭ u krainie budzie zapuščanaja paśla praviadzieńnia vyprabavańniaŭ hetaj techniki. «Dumaju, na praciahu hoda-dvuch, - skazaŭ Vital Voŭk. - Da hetaha buduć dośledna-pramysłovyja partyi. Ekspłuatacyja pačniecca raniej. Moža być, navat u nastupnym hodzie». Što datyčycca raźvićcia traktarabudavańnia ŭ Biełarusi ŭ cełym, padčas narady była padkreślena nieabchodnaść pašyrać namienkłaturu techniki, kab pavysić ekspartny patencyjał krainy i zabiaśpiečyć unutrany rynak.
